“Reforma në drejtësi me rëndësi jetike për vendin, e ka mbështetur që në gjenezë, si nismëtar i procesit, duke kulmuar me miratimin konsensual në Parlamentin shqiptar të paketës kushtetuese” është shprehur Presidenti Bujar Nishani.
Pas takimit me Ambasadorin e Shteteve të Bashkuara në Tiranë, Donald Lu dhe ajo e Bashkimit Europian, Romana Vlahutin, kreun e Shtetit, tha se në takim u bisedua rreth shqetësimit zyrtar të ngritur nga ministri i Drejtësisë, Petrit Vasili, lidhur me ushtrimin e detyrave të Operacionit Ndërkombëtar të Monitorimit.
Presidenti Nishani theksoi se e konsideron shumë të rëndësishme mbështetjen konsensuale edhe të fazës së zbatimit të kësaj reforme, duke iu përmbajtur detyrimit të të gjitha palëve për të respektuar në gërmë Kushtetutën e Republikës së Shqipërisë.
Në këtë kontekst, Kreu i Shtetit vlerësoi angazhimin e partnerëve ndërkombëtarë, SHBA dhe BE në realizimin e kësaj reforme permes një procesi të paanshëm, ligjor dhe të besueshëm për qytetarët shqiptarë.
