Deputeti socialist akuzon ministrin e LSI-së për emërime partiake në krye të drejtorive në Lushnje
“Të paditurit e të paaftët po shkatërrojnë drejtorinë e Lushnjes për kullimin dhe ujitjen zonave bujqësore” është kjo akuza e deputetit socialist Erjon Braçe për ministrin e qeverisë së tij, Edmond Panariti. Përmes një postimi në facebook, Braçe denoncoi emërimin e të paaftëve në këtë drejtori nga ministri Panariti. Sipas Braçes: “Ndërmarrja më e mirë në vend po shkatërrohet përfundimisht!! Ka një grusht njerëzish në Ministrinë e Bujqësisë, sa të paditur, sa të paaftë, sa abuzues, sa të ligj, por shumë të qartë në qëllime banale partie, që janë të angazhuar cdo ditë të shkatërrojnë.
Drejtorit të Bordit Rajonal të Jugut i duhen vendet dhe drejtori i emëruar dhunshëm e pa asnjë meritë profesionale, i paditur tërësisht nga puna që ka marrë përsipër të drejtoje, domosdo, ka gjetur kete zgjidhje, nga Lushnja në Finiq, që ata të thonë nuk vemi dhe nuk kane si të shkojnë, dhe ky të ketë dy vende pune të lira. Kaq banalë janë”, shkruan Braçe.
Me të njëjtën mënyrë, me një status në facebook, reagoi ministry I LSI-së në qeverinë Rama. Ai I përgjigjet kështu deputetit Braçe:
“Dyfishim i eksporteve të perimeve dhe frutave, në rrethin e Lushnjës. Mbi 60 milion dollarë me shumë të ardhura për fermerët dhe ekonominë kombëtare, në krahasim me një vit me parë.
Le të përpiqemi së bashku Erjon që të gjejmë një vit në historinë e këtij vendi ku prodhimi bujqësor dhe eksportet të kenë njohur një kërcim të tillë. Është e kotë… Nuk ka…!!”, shkruan ndër të tjera ministri Panariti. Ai ka argumentuar gjatë e me shifra të kundërtën e asaj që pretendon Braçe.
