52 fshatra në Memaliaj kanë mbetur të izoluara si pasojë e mungesës së rrugëve. Banorëve të këtyre zonave u duhet të udhëtojnë për disa orë në këmbë për të sjellë prodhimet në treg.
Bashkia Memaliaj ka parashikuar për vitin 2017 ndërhyrje mirëmbajtëse në 5 rrugë rurale kritike. Nënkryetari i Bashkisë Memaliaj, Fetah Hoxha, thotë që 45% e banorëve në këtë bashki është pa rrugë që lidh fshatrat me njësinë administrative.
Hoxha sqaron më tej se “…kjo situatë është e hershme, ka shumë vite. Duke qenë të copëtuara, Bashkitë nuk kanë mundur t’i ndërtojnë këto rrugë. Tani bashkia e re, pas ndarjes territoriale, jep mundësinë të ndërhyjmë në këto rrugë. Pothuajse pjesa më e madhe e fshatrave janë rrugë, kanë një rrugë sa për të qenë, që nuk i plotësojnë standardet për të kaluar një makinë. Në rast se u bien reshje, ato bllokohen. Ne kemi filluar që me buxhetin e 2015, që të ndërhyjmë në disa rrugë. Por ende ka shumë për t’u bërë. Këtë vit presim aprovimin e buxhetit, në mënyrë që të parashikojmë se ku mund të ndërhyjmë”.
