Nga Mesila Doda
Grekët e rinj po ja dalin sfidës për të na habitur përditë e më fort nga përmasa e marrëzisë që po i kaplon…
Ministri i grek i Mbrojtjes, Panos Kamenos, i njëjti që para disa javësh na tregonte me krenari muskujt bufalaq në stërvitjen ushtarake në kufi të trupave ushtarake pjesë të NATO-s, sot i tregoi djemve shqiptarë që përgatiteshin të kryenin shërbimin ushtarak në shtetin fqinjë e që aq hijshëm bënin shenjën e shqiponjës, se do duhej të përballeshin me akuza të rënda penale e deri antikushtetuese nga autoritetet shtetërore të fqinjit të nevrikosur.
Tërbimin e shkaktoi një gjest krejt i thjeshtë, i bukur e gjithaq i respektueshëm i djemve shqiptarë që kanë zgjedhur të marrin edhe nënshtetësinë greke e që tregon për një respekt të thellë ndaj origjinës së tyre, por ndërkohë edhe respekt ndaj të tashmes që kanë zgjedhur. Respektojnë të kaluarën dhe origjinën e ndërkohë po më të njëjtin respekt e përkushtim plotësojnë detyrimin shtetëror për të kryer një shërbim ushtark të gjatë e të vështirë në shtetin që kanë zgjedhur.
Çfarë e shkakton tërbimin e autoriteteve fqinje? Fakti që djemtë shqiptarë nuk vuajnë nga amnezia, apo që nuk kanë frikë ta shprehin këtë origjinë, sepse me sa duket rrejshëm mendojnë se jetojnë në një shtet demokratik, ku duhet të respektohen të drejtat e njeriut. Pikërisht, nisur nga kjo Kartë Universale e të Drejtave të Njeriut, askush nuk mund të diskriminohet prej origjinës, racës, bindjeve fetare e politike e kjo në “djepin e demokracisë”, në atdheun e Sokratit, Platonit e Aristotelit do duhej të ish guri i themelit të marrëdhënieve njerëzore e institucionale. Dikush guxon në kohën tonë të kërcënojë një qenie tjetër njerëzore, sepse respekton të kaluarën e origjinën e tij?
E gjithë kjo histeri deklaratash, arrogance e akuzash shtetërore të shtetit fqinj ka veç një emër; frikë nga historia dje, sot dhe nesër. Ata e dinë fort mirë se çfarë kanë bërë në emër të helenizmit, dinë krimin dhe bashkëjetesën që kanë bërë me të. Ne duhet t’i japim një dorë që të çlirohen nga frika. Duhet të nxjerrim krimin e djeshëm sheshit dhe të ndërtojmë bazat për një të ardhme moderne mes nesh.
