Kanë qenë të shumtë qytetarët që janë paraqitur në zyrën e ankesave në Ujësjellësin e Tiranës, sepse kanë marrë mbifaturime të mëdha për ujin e pijshëm. Largimi i 437 punonjësve në prag të Vitit të Ri nga drejtori i Ujësjellësit, Neritan Gjojdeshi ka sjellë një kaos të vërtetë. Kanakari i Koço Kokëdhimës i ka zëvendësuar punonjësit me përvojë me punonjës pa eksperiencë, por që plotësojnë kriterin e vetëm “2K”.
Për pasojë ka patur anomali dhe abuzime me faturat e ujit të pijshëm.
Një pensionist jeton në zonën e Kombinatit tregon që nëse faturohej me 800 apo 1000 lekë në muaj nga UKT, po për janarin ai duhet të paguajë 8000 lekë, pra rreth 7000 lekë më tepër. Ai thotë se konsumon ujë vetëm për nevojat familjare dhe se faturimi është abuziv.
Qytetari: “Këtë radhë më erdhi 82 mijë e kusur.Nuk kam ku e gjej pse më erdhi kaq shumë. Faturë nuk kam, fatura nuk më vjen. Ku ta gjej unë? Ata thonë bëj kartën e identitetit , bëj fotokopjen e kësaj dhe bëj ankesë.”
Një tjetër qytetar ankohet se është faturuar sipas dëshirës të punonjësit të UKT, pasi sahati nuk funksionon.
Qytetari: “Mora vesh që janë ndërruar mbi 400 punonjës, për të qënë të rregullt ato direkt sa kanë ardhur të rinjtë kanë parë sahatin e prishur dhe ja kanë futur numrin sipas qejfit.Aq sa ka dashur vetë ka shkruajtur, me sahat të prishur. Nuk ka ndodhur as në verë të paguajë 30 mijë lekë.”
Kjo zonjë që paguan çdo detyrim ndaj UKT, ankohet se uji që vjen në shtëpi është i pakonsumueshëm.
Qytetari: “Uji që vjen në çezmë nuk e pij sepse mban erë. Unë mbush kovat dhe e shoh poshtë tyrë që është e zezë.”
/Intervistat marrë nga Ora News/
