Takimi i nivelit të lartë do të mbahet në në Londër më 22 shkurt, marrin pjesë kryeministrat e vendeve të Ballkanit
Kryeministrat e Ballkanit do të mblidhen më 22 të këtij muaji në Londër për të diskutuar për mundësitë e bashkëpunimit. Samiti i nivelit të lartë i organizuar nga BERZH do të ketë në fokus të diskutimeve zhvillimet e transportit, energjisë së rinovueshme dhe axhendën e privatizimit në Ballkanin Perëndimor.
Në takim do të jenë kryeministrat e Shqipërisë, Bosnjës e Hercegovinës, Kroacisë, Kosovës, Maqedonisë, Malit të Zi dhe Serbisë.
Sipas njoftimit të dalë nga BERZH, fjalimet e hapjes në takim do të mbahen nga Presidenti i Bankës Europiane për Rindërtim e Zhvillim, Chakrabarti dhe Sekretari i Jashtëm britanik, Philip Hammond. Më pas kryeministrat, ministrant e qeverive, vendimmarrësit politikë dhe sipërmarrësit e investitorët në tre panele kryesore do të debatojnë për zhvillimin e lidhjeve të transportit, potencialet për energjinë e rinovueshme dhe axhendën e privatizimit në Ballkanin Perëndimor.
Po ashtu në kuadër të mbështetjes së BERZH për një platformë inovative rajonale për tregtimin e letrave të listuara në bursat e bullgare, kroate dhe maqedonase, pritet që nismës ti bashkohen edhe bursa serbe dhe sllovene. Synimi është rritja e integrimin rajonal të tregjeve të kapitalit.
Samiti synon që të nxjerrë në pah investimet dhe mundësitë për biznes në rajon, si edhe të nxisë fluksin e investimeve të huaja direkte dhe projektet ndërkufitare.
Samiti është vazhdim i Forumit të parë të Investimeve të Ballkanit Perëndimor në BERZH i mbajtur në shkurt 2014, forum ku për herë të parë u bënë së bashku të gjithë kryeministrat e rajonit.
