Një mbrëmje tejet e veçantë ajo në Teatrin Kombëtar të Operas dhe Baletit. “Arrëthyesi” i rikthyer në skenë me koreografi të Ilir Kernit ishte një shfaqje me të vërtetë e shkëlqyer. E gjithë vepra ishte vënë në skenë me mjaft elegancë dhe mjeshtri. Atmosfera e krijuar ishte krejt si në përrallë, ndërsa interpretimi i balerinëve shumë i goditur.
Vepra, e cila bën pjesë në repertorin klasik të TKOB u soll në mënyrë tejet origjinale edhe falë skenografisë së lëvizshme, por tejet praktike. Në të njëjtën skenë mund të gjendeshe si në një sallon balloje aristokratik, po ashtu edhe në një pyll. Magjia e “Arrëthyesit” vinte shumë bukur falë dritave të kuruara me aq kujdes. Skenografia dhe ndriçimi u realizua nga Zorz Drausnik.
Kostumet ishin të epokës dhe të shumëllojshme, pasi dhe vepra të çon në pak minuta në disa realitete. Kostumografia tek “Arrëthyesi” është një sfidë e vërtetë, e cila u përballua shumë mirë nga Elva Bello.
Trupa e baletit ishte në një nga ditët e saj më të mira, gjë që e treguan edhe duartrokitjet, të cilat nuk rreshtën të paktën për 20 minuta. Ledia Sulaj, Ervis Nallbani, Adela Muçollari, Julind Dervishi, Eltion Merja ishin disa nga yjet e mbrëmjes, por në fakt të gjithë balerinët kanë dhënë më të mirën e tyre, nga fëmijët, deri tek ata me më përvojë.
Muzika e magjishme e Çaikovskit erdhi prej Orkestrës Simfonike të TKOB, drejtuar nga Manuel Busto.
Arrëthyesi do të vazhdojë të shfaqjet në datat 15, 20 dhe 21 shkurt, gjithmonë në orën 19.00. Është një rast që nuk duhet humbur.
