Sot Ditëlindja e Lasgushit dhe një vjershë nga “Ylli i Zemrës” botuar në “Përpjekja” shtator 1937
Sot 117 vjet më parë, lindi poeti Llazar Sotir Gusho, i njohur nën pseudonimin Lasgush Poradeci. Ai lindi më 27 dhjetor të vitit 1899 në Pogradec dhe ndërroi jetë më 12 nëntor të vitit 1987. Në moshën 10- vjeçare u largua për në Manastir. Përfundoi studimet në Grac të Austrisë. Lasgush Poradeci vlerësohet si një nga romantikët më të rëndësishëm e të fundit në letërsinë shqipe. Dy vëllimet me poezi janë “Vallja e yjeve” më 1933 dhe “Ylli i zemrës” më 1937, botuar në kryeqytetin rumun. Vëllimi i parë i botuar me ndihmën e mërgatës shqiptare në Konstancë; vëllimi i dytë i botuar me ndihmën e Kutelit përmban edhe vargje të përpunuara nga vëllimi i parë me poezitë me vargënimin e melodinë më të hollë në gjuhën shqipe. Për të përkujtuar ditëlindjen e Lasgushit, 27.al ka zgjedhur një prej vjershave të tij shkëputur nga vëllimi Ylli i Zemrës, botuar në revistën Përpjekja në shtator të vitit 1937.
Po qan vasha më shtëpi
Po qan vasha më shtëpi:
Ç’kanë shoqet përsëri,
Ç’më shëkojnë me çudi,
Sikur s’jam si ‘to njeri,
Sikur jam një çilimi
***
Thonë shoqet përsëri:
Mblidhe mëndjen ti moj ti,
Ay trimi moj i ri
Po të tret posi qiri.
***
Thotë vasha me mëri:
Trimin do ta mbaj në gji!
Thonë shoqet me zili:
Ay trimi ti moj ti,
Po të djeg, po të bën hi,
Po të fut në dhe të zi.
***
Thotë vasha përsëri
Fjalëzë më ëmbëlsi,
Fjalëzë me dhëmbshuri,
Fjalëzë plot vrer të zi:
Ja më trimin lër-më-ni,
Ja pa trimin merr-më-ni
Mer-më-ni moj thër-më-ni
Lasgush Poradeci
