Dreka madhështore në qëndër të katër fshatrave, Dejë, Shelqet, Mjedë dhe Spathar, ku festohen bashkë Bajram e Pashkë
Një drekë e madhe krishtlindjesh është shtruar dje për banorët e katër fshtarave në bashkinë Vau i Dejës. Dy prej këtyre fshatrave banohen nga popullsi myslimane e dy të tjera nga popullsi e besimit katolik. Ata kanë të përbashkët mes tyre harmoninë e vërtetë fetare që ekziston prej shumë kohësh. Ata i festojnë bashkë Bajram e Pashkë duke respektuar maksimalisht trashëgiminë në festimet e përbashkëta të të gjitha festave fetare.
Edhe në këtë Krishtlindje, të rinjtë nga katër fshatrat, Dejë, Shelqet,Mjedë dhe Spathar u organizuan me iniciativën e tyre për mënyrën e tyre festive, me qëllim të përçojnë te të gjithë familjet atmosferën festive.
Babagjyshi, Pashk Drini, përcolli atmosferë shumë emocionuese veçanërisht tek fëmijët e kësaj ane. Përveç pamjes madhështore të Babgjyshit të krishtlindjeve, fëmijët u gëzuan edhe me dhurata të blera nga kontributi i banorëve të katër fshatrave, por edhe nga bizneset vendase.
Të rinjtë e fshatrave të kësaj zone nisën ritualin e marshimit drejt qendrës ku përfunduan ritet fetare në mesditë, pjesë e cila harmonizon besimtarët në kryerjen e vizitave. Mjeti i improvizuar i shoqëruar nga babagjyshi e ndjekur nga fëmijët, iu bashkuan grupit të banorëve, ku dhe ndanë dhurata për të vegjlit.
Mjaft interesante është dhe tryeza e improvizuar pranë qendrës nga prodhimet dhe pijet vendase, ku festohet bashkërisht atmosfera e Krishtlindjeve si dhe të gjitha festat në katër fshatrat.
Këto katër fshatra, Shelqet, Dejë, Mjedë dhe Spathar janë shembull pozitiv i harmonisë fetare, karakteristikë që e bën Shqipërinë një vend unik dhe shembull për vendet e tjera. Bashkjetesa fetare në Shqipëri, është promovuar si një vlerë e jashtëzakonshme edhe nga Papa Françsku, i cili vizitoi Shqipërinë në shtatorin e një viti më parë.
