Synimi për të bërë parkun e dytë pas Liqenit Artificial, Bashkia e Tiranës ka mbjellë 450 pemët e para në liqenin e Farkës.
Kreu i bashkisë Erjon Veliaj tha se mbjellja e pemëve në këtë park do të rrisë cilësinë e ajrit në radhë të parë, por edhe do ti japë liqenit një dimension të ri. Krahas pedonales që do të rrethojë parkun, tashmë ka nisur aksioni për pyllëzimin e plotë të hapësirave rreth liqenit.
Ai theksoi se mbjellja e pemëve në këtë zonë i shërben objektivit madhor që Bashkia e Tiranës i ka vënë vetes për të krijuar atë që në Planin e Përgjithshëm Vendor njihet si “Pylli Orbital”.
Kryebashkiaku i Tiranës njoftoi nismën për t’i krijuar mundësinë çdo qytetari që të kontribuojë në krijimin e Pyllit Orbital, duke mbjellë secili pemën e vet në hapësirat që do të përcaktohen nga bashkia.
