Taksa të reja e detyrim për distancë 100 metër ndërmjet bizneseve
Ligji i ri për lojrat e fatit ka hyrë në fuqi pas një kalvari të gjatë gati dyvjeçar, që nga hartimi i projektit deri në miratimin e tij në Kuvend. Ligji i detyron të gjitha subjektet që në respekt të distancave të reja brenda datës 31 dhjetor 2016 organizatorët e lojrave të fatit duhet të marrin masat për ndryshimin e vendndodhjes. Distancat ndërmjet subjekteve të lojërave të fatit nga institucionet e parashikuara ligj duhet të jenë jo më pak se, 100 metra në vijë ajrore në të gjitha drejtimet. Mënyra e përllogaritjes së distancave sipas kësaj pike përcaktohet me udhëzim të ministrit të Financave.
Ligji i ri gjithashtu ndalon nxitjen për të marrë pjesë në lojërat e fatit. Ndalohet ofrimi, ndihma ose nxitja e një loje apo e lojërave të fatit në Republikën e Shqipërisë. Organizatorët e lojërave të fatit janë të detyruar të vendosin në mënyrë dalluese në ambientet ku luhen lojëra fati mesazhe në lidhje me luajtjen e lojërave të fatit nga lojtarët në mënyrë të përgjegjshme, rreziqet e mundshme të lojërave të fatit, si dhe shanset reale për të fituar. Gjithashtu ligji i ri ndalon zhvillimin e aktivitetit të lojrave të fatit pranë institucioneve fetare, institucioneve të arsimit parauniversitar dhe institucioneve të arsimit të lartë. Sipas ligjit të ri afati i licencimit për të gjitha bizneset në të gjitha kategoritë e lojërave të fatit do të jetë 10 vjet, me të drejtë ripërsëritjeje. Në ligj janë të përcaktuara qartë edhe tarifat e licensimit për cdo lloj subjekti të këtyre aktiviteteve. Po ashtu ligji i ri bën përcaktime të plota për të gjithë taksat dhe tarifat e tjera që duhet të paguajnë subjektet që operojnë në tregun e lorave të fatit.
