Tenori shqiptar me famë ndërkombëtare, Saimir Pirgu është zyrtarisht shqiptari i parë në botë që është nominuar për çmimin Grammy.
Pirgu njofton se, opera King Roger, shfaqur në operan mbretërore të Londrës, është përzgjedhur si “Regjistrimi më i mirë operistik ” për çmimin “Grammy Awards 2017”.
Gazetat më prestigjioze botërore, kanë veçuar tenorin shqiptar për talentin dhe cilësinë e performancës së tij në rolin e “Shepherd”.
“Saimir Pirgu, tenori shqiptar i shkëlqyer dhe i zjarrtë, me një zë të pagabueshëm, ka mjaftueshëm karizëm në zërin e tij sa të mbajë të gjithë mbretërinë të përqëndruar tek Shepherd-i i tij,” shkruan gazeta e njohur britanike “The Independent” në maj të këtij viti (2016), pasi vlerësoi maksimalisht shfaqjen.
Ajo që e bën edhe më të madh ndikimin e Pirgut në nominimin e kësaj opere për ”Grammy”, është pesha e madhe e rolit të tij dhe niveli i lartë i vështirësisë.
Edicioni i 58-të i ceremonisë së ndarjes së çmimeve “Grammy” do të transmetohet ‘live’ në stacionin amerikan CBS më 12 shkurt. Eventi do të prezantohet nga aktori komik James Corden dhe do të zhvillohet në arenën e “Staples Center” në Los Angeles.
