SHBA-ja dhe Irani duhet ende të zgjidhin disa pika të mbetura pezull përpara arritjes së një marrëveshjeje, deklaroi zëvendëspresidenti amerikan JD Vance.
I pyetur nga BBC nëse Presidenti Donald Trump ishte pranë nënshkrimit të një marrëveshjeje, Vance tha se është ende herët për të thënë “kur dhe nëse” palët do ta finalizojnë atë.
Më herët gjatë së enjtes, zyrtarë amerikanë i thanë BBC-së se Uashingtoni dhe Teherani kishin rënë dakord mbi një kuadër paraprak marrëveshjeje, të njohur si memorandum mirëkuptimi, i cili pritet të miratohet nga Trump dhe udhëheqja iraniane.
Sipas raportimeve, marrëveshja do të zgjasë armëpushimin me 60 ditë dhe do të hapë bisedime për të ardhmen e programit bërthamor iranian. Megjithatë, agjencia gjysmëzyrtare iraniane Tasnim raportoi se dokumenti ende nuk është finalizuar apo konfirmuar zyrtarisht.
Korniza e propozuar parashikon gjithashtu kalim “të pakufizuar” në Ngushticën e Hormuzit, ndërsa Iranit mund t’i jepen 30 ditë kohë për të hequr minat detare nga korridori strategjik i anijeve.
Nga ana tjetër, SHBA-ja pritet të lehtësojë bllokadën dhe të japë përjashtime nga sanksionet, duke i hapur rrugë rifillimit të eksporteve iraniane të naftës.
Mediumi amerikan Axios, që raportoi i pari për marrëveshjen paraprake, shkruan se Donald Trump është informuar mbi draftin, por nuk e ka firmosur ende dhe pritet ta shqyrtojë gjatë ditëve në vijim.
Ngushtica e Hormuzit konsiderohet një nga pikat më strategjike të botës, pasi rreth një e pesta e naftës dhe gazit natyror të lëngshëm kalon përmes saj. Çdo bllokim i saj ka ndikim të drejtpërdrejtë në tregjet globale të energjisë.
Duke folur në Uashington, JD Vance tha se negociatorët po diskutojnë ende disa formulime dhe veçanërisht “çështjen e pasurimit të uraniumit”.
“Nuk kemi mbërritur ende në fund, por jemi shumë afër dhe do të vazhdojmë të punojmë për këtë”, deklaroi ai.
Prej kohësh, SHBA-ja kërkon që Irani të ndalojë pasurimin e uraniumit në nivele të larta dhe të asgjësojë rezervat ekzistuese, të cilat teorikisht mund të përdoren për prodhimin e armëve bërthamore.
Irani, ndërkohë, këmbëngul se programi i tij bërthamor ka vetëm qëllime paqësore dhe mohon synimet për armë bërthamore.
Vance u shfaq optimist në deklaratat e tij, duke theksuar se SHBA-ja beson se pala iraniane po negocion “me vullnet të mirë”.
Ndërkohë, mediat shtetërore iraniane publikuan të mërkurën detaje nga një draft jozyrtar me 14 pika, i cili përfshin heqjen e bllokadës detare amerikane ndaj porteve iraniane, tërheqjen e forcave amerikane nga rajoni përreth Iranit dhe rikthimin e trafikut civil në Ngushticën e Hormuzit, nën menaxhimin e Iranit dhe Omanit.
