Çmimet e naftës kanë pësuar rënie pasi presidenti amerikan Donald Trump deklaroi sërish se lufta me Iran mund të përfundojë shumë shpejt.
Nafta bruto Brent ra me 0.8 për qind në 110.40 dollarë për fuçi, ndërsa nafta amerikane West Texas Intermediate pësoi rënie prej 0.6 për qind, duke zbritur në 103.48 dollarë për fuçi.
Analisti i lartë i kërkimit të naftës në LSEG, Emril Jamil, deklaroi për Reuters se tregu po reagon ndaj mundësisë së një marrëveshjeje dhe zhvillimeve gjeopolitike.
Sipas tij, edhe nëse arrihet një marrëveshje, çmimet mund të mbeten të larta pasi furnizimi me naftë nuk pritet të rikthehet menjëherë në nivelet para konfliktit.
Një ditë më parë, tregjet e naftës kishin rënë me afro 1 dollar për fuçi pasi zëvendëspresidenti amerikan JD Vance deklaroi se SHBA-ja dhe Irani kishin bërë përparim në bisedime.
Presidenti amerikan, Donald Trump, ka deklaruar së fundmi se ishte “vetëm 1 orë larg” vendimit për të urdhëruar sulme të reja ndaj Iranit, por tha se e pezulloi operacionin pas kërkesës së aleatëve të Gjirit Persik.
Propozimi i fundit i marrëveshjes i dërguar nga Teherani në Uashington përfshin disa elemente kryesore: heqjen e sanksioneve ndërkombëtare ndaj Teheranit, lirimin e aseteve iraniane të ngrira jashtë vendit, përfundimin e “bllokadës” ekonomike të vendosur ndaj vendit, tërheqjen e forcave amerikane nga zonat pranë Iranit dhe mbulimin e shpenzimeve për dëmet e shkaktuara nga lufta.
Plani parashikon gjithashtu përfundimin e konfliktit në të gjitha frontet rajonale, përfshirë Libanin, sipas zv/ministrit të jashtëm iranian.
SHBA ka kërkuar që Irani të heqë dorë nga ambiciet bërthamore. Zëdhënësja e Shtëpisë së Bardhë tha se Irani nuk mund të ketë uranium të pasuruar dhe kjo përbën një “vijë të kuqe” në negociata, së bashku me ndalimin e plotë të programit bërthamor iranian.
