Kryeministri britanik Keir Starmer ka deklaruar se nuk do të japë dorëheqjen dhe nuk do të “zhysë vendin në kaos”, pas humbjeve të mëdha të Partisë Laburiste në zgjedhjet lokale në Angli, Skoci dhe Uells.
Rezultatet kanë rritur presionin ndaj tij, pasi laburistët kanë humbur mbi 1 100 vende në këshillat lokalë dhe kanë humbur pushtetin në Uells pas 27 vitesh.
Ndërkohë, në Skoci, SNP mbetet forca më e madhe, por pa shumicë absolute.
Sipas projeksioneve të BBC-së, partia Reform UK del e para me 26% të votave, ndërsa të Gjelbrit renditen të dytët me 18%, laburistët e konservatorët ndahen në vendin e tretë me nga 17%, duke sinjalizuar një ndryshim të madh në politikën britanike.
Starmer ka thënë se do të qëndrojë në detyrë dhe se synon të bashkojë partinë, duke theksuar se zgjidhja nuk është zhvendosja majtas apo djathtas, por fokusimi tek prioritetet e qytetarëve.
Megjithatë, brenda Partisë Laburiste ka kritika të forta dhe thirrje për dorëheqje ose afat largimi, ndërsa disa ministra dhe figura të larta e kanë mbështetur atë, duke kërkuar unitet dhe stabilitet politik.
