Në një komunikim me gazetarët nga selia e Partisë Demokratike, Sekretari i Përgjithshëm i PD Flamur Noka deklaroi se gara për kryetarin e ri të partisë është e hapur për çdo anëtar.
Ndërsa theksoi se “dyert e PD-së janë të hapura” për çdo demokrat që plotëson kriteret dhe shpreh ambicien për të kandiduar, Noka u shpreh prerë se kjo hapje nuk vlen për të gjithë. Ai përdori një gjuhë ironike për të përjashtuar figura të caktuara, duke i cilësuar si “Gysi” dhe “mafiozi Varikarlo”.
Noka sfidoi mediat të gjenin qoftë edhe një anëtar të PD-së të cilit i ishte refuzuar e drejta për të aplikuar. Ai këmbënguli se afati për dorëzimin e kandidaturave ishte i hapur deri në mesnatë dhe se çdo demokrat i vërtetë ishte i mirëpritur.
Flamur Noka: Tani, unë në 13 mars kur kryesia e PD ka marrë vendim kryesia e PD për çeljen e garës për kryetar, ju kam komunikuar që gara është hapur dhe besoj që kemi qenë transparent.
Tani, ka një muaj, ka patur çdokush që aspiron për të aplikuar dhe ka afat deri në 12 të natës.
Çdo anëtar i Partisë Demokratike që plotëson kriteret. A, ju thoni kur të hapet gara për administratorin e bizneseve të Gysit, atëherë është tjetër gjë. Unë flas për Partinë Demokratike. Apo kur të hapet gara për ndonjë vend surrogato te TV Varikalon, atëherë janë të tjera gjëra. Unë flas për kriteret e partisë dhe për garën e partisë.
Gazetarët: Të ishit pak më serioz, pasi ju vetë e keni akuzuar ish-kryetarin Lulzim Basha se i ka mbyllur dyert…
Noka: Dyert… Hajdeni këtu, ja shikojeni dyert. Janë të hapura dyert apo jo? A janë të hapura dyert? A janë të hapura dyert? Tani, por, ama një gjë do ju sqaroj. Për Gysin nuk ka për të qenë kurrë kjo derë e hapur. Për, më fal, për mafiozin Varikarlon s’do jetë kurrë…
Gazetarët: Po për një demokrat që ju quajtët se bënte burg politik për Partinë Demokratike, është e hapur?
Noka: Tani, unë po ju them, për Gysin apo për Varikarlon, kjo derë, më vjen keq… Kur të caktohet gara për administratorin e Gysit, të shkojnë ta aplikojnë të gjithë. Për Partinë Demokratike duhet të jesh pikë së pari demokrat, jo t’i shërbesh Ramës, duhet të jesh njeri që u shërben demokratëve.
Gazetarët: Po kandidatja zonja Noka, është një person e cila ka qenë…
Noka: Mirela Sela është demokrate. Është anëtare e partisë. Prit, prit. Më fal. Është pritur, ka dorëzuar. A i plotëson kriteret, a s’i plotëson kriteret, është çështje e institucioneve. Por ajo është demokrate dhe absolutisht. Por, ju mund të doni që Edi Rama të sjellë dokumenta për, jo, Gysi, jo, Sueli, jo, më vjen shumë keq. Ka kritere kjo parti. Ka një vijë të kuqe.
Gazetarët: A nuk besoni se ju mund t’i jepni alternativë edhe siç po thoni juve, pra nuk keni besim se demokratët do dinë të zgjedhin kush do të jetë drejtues i Partisë Demokratike?
Noka: Absolutisht, po. Demokratët e kanë treguar kur shpëtuan Partinë Demokratike nga kthetrat e narko-regjimit dhe të Edi Ramës. Kjo është koshiencë politike siç kanë demokratët, nuk ka asnjë qytetar shqiptar tjetër në këtë vend. Për këtë jemi, jemi të, jemi krenarë për demokratët që përfaqësojmë. Ama po ju them një gjë. Unë e kuptoj shumë mirë që ka media që regjimi kërkon t’i përdorë, por është e drejta e mediave…
Gazetarët: Po flasim për garën e brendshme në Partinë Demokratike, zoti Noka. Është e drejtë e mediave…
Noka: Prit. Por ama po ju them një gjë. Kur të bëhet gara për administratorin e Gysit… Po flasim për garën e brendshme të Partisë Demokratike, apo të Varikarlos, është tjetër gjë. Gara e Partisë Demokratike është tjetër gjë.
Gazetarët: Zoti Noka, po e çoni sërish Partinë Demokratike drejt një përplasje në gjykatë me demokratët.
Noka: Elda. A ke parë diçka ti, ka ndonjë anëtar i Partisë Demokratike që ka aplikuar dhe i është refuzuar e drejta e aplikimit? Më thoni një.
Gazetarët: Nuk u prit në mënyrë serioze. Nuk ishte një person nga zyra e protokollit. Mungonte anëtari i komisionit zgjedhor.
Noka: Unë po ju bëj një pyetje. Dini ju që një anëtar i PD-së ka aplikuar dhe nuk i është pranuar aplikimi? Asnjë! A, ju doni që të aplikojë Gysi apo Varikarlo? Nuk ndodh. Faleminderit. Ju duam shumë!
