Një 46-vjeçar, Ylli Berisha, i cili prej vitesh jeton duke lypur, është vënë përballë drejtësisë pasi akuzohet se nuk i është bindur urdhrit të policisë për të ndaluar lypjen pranë një farmacie në Tiranë. Ngjarja dyshohet se ka ndodhur dy vite më parë, kur ai është shoqëruar në komisariat pas ndërhyrjes së efektivëve të rendit.
Prokuroria ka kërkuar shpalljen fajtor të të pandehurit dhe ka dhënë pretencën prej 2 muaj burg, me sugjerimin që dënimi të konvertohet në 4 muaj shërbim prove. Sipas organit të akuzës, Berisha nuk ka zbatuar urdhrin e policisë dhe ka vijuar aktivitetin e lypjes në zonë, duke u konsideruar si mosbindje ndaj autoriteteve.
Nga ana e tij, i pandehuri ka mohuar akuzat, duke deklaruar se nuk ka kryer asnjë shkelje dhe se lyp për shkak të gjendjes së rëndë ekonomike. Avokati mbrojtës ka kërkuar mëshirë nga gjykata, duke theksuar situatën e vështirë sociale të klientit dhe mungesën e të ardhurave.
