Shoqëria “Arlis Ndërtim” ka reaguar zyrtarisht pas zjarrit të rënë në kompleksin e ndërtuar nga kjo kompani në zonën e njohur si “Farmacia 10” në Tiranë, ku u dogjën dhjetëra apartamente.
Në njoftimin e ndarë për media, kompania thekson se nuk ka asnjë detyrim ligjor në lidhje me rastin, ndërsa deklaron se do të financojë plotësisht rindërtimin e fasadës së pallatit të dëmtuar, si dhe rikonstruksionin e të gjitha apartamenteve të prekura.
“Shoqëria “Arlis Ndërtim” shpk pavarësisht se nuk mbart asnjë përgjegjësi ligjore, por në kuadër të përgjegjësisë sociale si kompani, si dhe angazhimit të saj për të qenë pranë njerëzve që e kanë besuar dhe banorëve të prekur, merr përsipër me shpenzimet e saj, rindërtimin e plotë të fasadës së pallatit të dëmtuar nga zjarri si dhe rindertimin e të gjithë apartamenteve të dëmtuara duke i kthyer në gjendjen fillestare, pra në të njëjtat kushte që banorët e kanë marrë apartamentin me çelësa në dorë në momentin e dorëzimit. Ky angazhim synon të kontribuojë në rikthimin sa më të shpejtë të kushteve normale të jetesës dhe në minimizimin e pasojave të kësaj ngjarjeje”, thuhet në reagim.
Ndërkohë kujtojmë se ishte Edi Rama ai i cili pak orë më parë deklaroi publikisht se pronari i kompanisë që ndërtoi pallatin, Armand Lilo do të financonte 100% rindërtimin e tij.
