Një familje shqiptare ka humbur jetën tragjikisht në banesën e tyre në Itali si pasojë e rrjedhjes së gazit nga kaldaja e ngrohjes.
Fqinjët e familjes Kola në banesën e tyre në fshatin Gryksh i Madh të Peqinit rrëfejnë se të ndjerët kishin emigruar prej rreth tre vitesh në Itali.
Më herët, familja kishte qenë në Greqi për punë sezonale, gjithmonë në kërkim të një jete më të mirë.
“Këto janë plagët e emigrimit. I nisëm fëmijët me duart tona dhe tani na kthehen me arkivol”, shprehen fqinjët mes dhimbjes për mediat.
“Jemi të shokuar nga kjo tragjedi që ka ndodhur në fshatin tonë. Nuk gjejmë dot fjalë të shprehemi. Ka qenë një familje e mrekullueshme, e shkëlqyer, gjithmonë duke parë punën e vet. Emigruan në Itali, e sot humbën jetën. E morëm vesh lajmin përmes mediave. Jemi të tronditur.”, shprehen ata.
Viktimat janë identifikuar si Arti Kola, 48 vjeç (kryefamiljar), bashkëshortja e tij Jonida Kola, 42 vjeçe, si dhe dy fëmijët e tyre, Hajdar Kola, 23 vjeç, dhe Xhesika Kola, 15 vjeçe.
Ngjarja e rëndë ka ndodhur në orët e mbrëmjes, në momentin kur familja sapo kishte shtruar darkën. Në rrethana ende të paqarta, dyshohet se një sasi gazi ka rrjedhur nga kaldaja e ngrohjes, duke shkaktuar asfiksimin fatal të të gjithë familjarëve.
Ka qenë vëllai i kryefamiljarit ai që ka dhënë alarmin dhe ka njoftuar karabinierët. Sapo kanë mbërritur në banesën trekatëshe, xhaxhai dhe forcat e rendit kanë trokitur disa herë, por pa marrë përgjigje. Më pas, dera është hapur me forcë dhe brenda është konstatuar skena dramatike, ku katër anëtarët e familjes ndodheshin të pajetë.
Si pasojë e ekspozimit ndaj gazit dhe tronditjes së rëndë psikologjike, edhe xhaxhai i dy fëmijëve të mitur ka humbur ndjenjat para karabinierëve dhe është transportuar me urgjencë në spitalin e Cisanello-s.
