Partia Socialiste ka rrëzuar me 72 vota kundër dy amendamentet e kryetarit të PD-së Sali Berisha të propozuara nga ai në Kuvend në projektligjin “Per buxhetin e vitit 2025″, që shqyrtohet sot në parlament nen për nen.
Amendamenti i parë për “Pezullimin e të gjitha prokurimeve për investime publike luksi të qeverisjes qendrore, deri në momentin e miratimit me ligj të masës financiare të minimumit jetik në Republikën e Shqipërisë”, mori 36 vota pro dhe 72 kundër. Amendamenti i dyrë për “Ndalimin e çdo pagese për shpenzime operative luksi të qeverisjes qendrore, deri në momentin e rritjes reale të pensioneve”, mori 37 vota pro dhe 72 kundër.
Mazhoranca rrëzoi edhe amendamentin e deputetit Flamur Noka për vendosjen e minimumit jetik 200 euro.
Ministrja e Shëndetësisë dhe Mbrojtjes Sociale, Albana Kociu tha se propozimi është “një propozim aspak serioz dhe nuk mund të vendoset absolutisht apriori, i pastudiuar, i pavlerësuar dhe i pabazuar mbi një metodologji mbi të cilën biem dakord të gjithë”.
Mazhoranca rrëzoi po ashtu amendamentet e 9 deputeteve demokrate për shëndetësinë, me në fokus Qendrën Spitalore Universitare “Nënë Tereza”. Në amendamentin e PD kërkohej “të çelet një fond i posaçëm për blerjen e një pajisje PET Skaner dhe dy pajisje akseleratore në QSUT, Tiranë. Fondi i posaçëm parashikon të përfshijë edhe shpenzimet për mirëmbajtjen e për qellim funksionimin e pandërprerë të pajisjeve. Ky fond detajohet dhe përdoret me vendim të Këshillit te Ministrave”. Po ashtu propozohej rritja e fondeve të ilaçeve të Spitalit Onkologjik, me jo më pak se 15 milionë euro shtesë. Në një tjetër amendament PD kërkonte rritjen me 50% të fondeve për barnat e rimbursueshme me 60 milionë euro shtesë.
Deputetët e opozitës kanë depozituar në total 55 amendamente, të cilat me shumë gjasë do të rrëzohen me forcën e kartonin nga mazhoranca gjatë seancës së kësaj të hëne.
Opozita ka kërkuar gjithashtu përmes amendamenteve rritjen e fondeve për ish-pronarët dhe ish-të përndjekurit, rritjen e buxhetit për Shëndetësinë, pezullimin e pagesave për koncesionet, etj.
