Italianët nuk janë aspak të kënaqur që në klubet e tyre, duke përfshirë edhe ato të elitës, po investohet për të përgatitur futbollistë, të cilët më pas luajnë për përfaqësuese të huaja. Ndërsa ajo që ndodhi në Ravena, sipas tyre ishte fare e palogjikshme. Në ndeshjen Itali – Shqipëri, për moshat deri në 17 vjeç, në skuadrën kundërshtare, nga 11 futbollistë të formacionit të parë, shtatë prej tyre vazhdojnë të përgatiten në akademitë më të mëdha italiane.
Alesandro Ahmetaj, futbollisti që luan për përfaqësuesen e Italisë U-17
“Duke parë ndeshje të tilla – tha për Raisport, shefi i delegacionit italian – pyes veten, nëse po punojmë për veten apo për ata”. Ndërkohë që është fakt, se edhe diferencat në fushë kanë rënë ndjeshëm. Ja edhe lista e futbollistëve që luajnë me moshat në skuadrat nga më të njohurat italiane: Portjeri Sinani (Novara), Doda (Sampdoria), Kumbulla (Verona), Pjetri (Udineze), Kalaj (Roma), Lakti (Fiorentina) dhe Kraja (Atalanta). Ndërkohë që në fushë gjatë ndeshjes së djeshme ishin edhe Rilind Nikovazi, i cili luan po për Atalantën dhe Ahmetaj i Çezenës.
