Është Ahmet Premçi, ish-drejtor i Policisë së Shtetit, nesër prezanton “Udhë në pasqyrë”
Këto kohë të vështira kur po nis zbatimi i reformës në drejtësi, gjeneral Ahmet Premçi, pritej të lakohej ndër emrat e mundshëm për pozicione të reja në sistem. Të paktën mediat e presin kështu një shfaqje të tij në publik pasi është përmendur si një ndër kandidatët e mundshëm për të drejtuar Byronë Kombëtare të hetimit.
Por jo. Ai vjen nesër për publikun si poet. Këto ditë doli nga shtypi libri i tij me poezi, “Udhë në pasqyrë.” Përmes këtij libri do të shohim se si një njeri “i fortë” vjen i “zbutur” për publikun si poet.
Ahmet Prençi ka mbajtur postin e drejtorit të përgjithshëm të Policisë së Shtetit dhe prej andej dha dorëheqje pasi u vranë katër polic në Durrës në vitin 2009. Pak kohë më parë ai dha sërish dorëheqjen nga post i drejtorit të Policisë tatimore. Vlerësohet si një ndër drejtuesit më të suksesshëm të policisë dhe gjithaq i vlerësuar nga ndërkombëtarët.
Ahmet Premçi u lind më 25 prill 1968 në Dibër. U diplomua në Fakultetin e Ekonomisë dhe Drejtësisë në Universitetin e Tiranës. Poezitë e para i ka botuar në vitin 1985 në disa gazeta të kohës. Ky është vëllimi i parë poetik që shoqërohet me recensionet e dy prej autorëve më të njohur shqiptarë, Agron Tufa dhe Besnik Mustafaj. Vëllimi është botuar nga Botimet M&B në bashkëpunim me Forumin Shqiptar për Aleancë të Qytetërimeve dhe do të promovohet ditën e shtunë, datë 22 tetor 2016, ora 11:00, te Restoranti “Nëna Mbretëreshë” tek Rruga e Elbasanit.
