UEFA Champions League rikthehet sonte në orën 21:00 me ndeshjet e fundit të fazës çerekfinale ku do të caktohen edhe dy skuadrat e mbetura të cilat do të kualifikohen në gjysmëfinale.
Misioni duket i realizueshëm për italianët e Interit, të cilët duhet thjesht, të administrojnë avantazhin prej dy golash, të arritur në takimin e vajtjes, përballë Benficës së Lisbonës.
Nëse e dalluat, përdorëm shprehjen “duket i realizueshëm”, prej faktit se skuadra e Simone Inzaghit ka qenë shumë pak bindëse në takimet e fundit e nuk përjashtohet që të shfaqë ndonjë amnezi në repartin e mbrojtjes.
Benfica nuk është një ekip që dorëzohet lehtë, pavarësisht se dhe luzitanët po kalojnë një periudhë të vështirë këto javët e fundit, me humbjen e fundit përballë Chavez në kampionat që ka bërë të ketë kritika të ashpra për mungesën e rotacionit në formacion nga ana e trajnerit Roger Schmidt.
Kjo ndeshje vlen shumë për të dyja skuadrat, sidomos për Interin që kërkon të shpëtojë sezonin. Lombardët kanë qenë katastrofike në kampionat, me renditjen aktuale që i sheh në zonën Europa League si dhe me gjysmëfinalen e Kupës së Italisë, përballë Juventusit që duhet fituar patjetër në mënyrë që sezoni të mos mbyllet me zero tituj (pa harruar se nuk është e garantuar fitorja në finalen eventuale përballë Cremonese/Fiorentina).
Inzaghi pritet ta rreshtojë Interin e tij në fushë, me formacionin 3-5-2:
Onana; Darmian, Acerbi, Bastoni; Dumfries; Barella, Brozovic, Mkhitaryan, Dimarco; Dzeko, Martinez.
Nga ana tjetër, duke mos patur asgjë për të humbur, Benfica do zbresë në San Siro, me një rreshtim 4-2-3-1 me mentalitet sulmues:
Vlachodimos; Gilberto, Silva, Otamendi, Grimaldo; Luis, Chiquinho; Joao Mario, Rafa, Aursnes; Ramos.
Në takimin tjetër, që do të luhet në Allianz Arena të Mynihut, Bayerni do tentojë të realizojë misionin e vështirë, të përmbysjes të disavantazhit prej tre golash ndaj Manchester City-t.
Djemtë e Tuchel, nuk po kalojnë një periudhë të qetë, mes sherrit në dhomat e zhveshjes pas ndeshjes në Mançester mes Mane dhe Sane deri te barazimi tejet zhgënjyes kundër Hoffenheim (1-1) në Bundesliga.
Në Bavari, fitimi i kampionatit, tashmë dihet që nuk mjafton, për të cilësuar të suksesshëm, sezonin e një klubi që kërkon triumfin në kompeticionin elitar të Europës.
Pra, Tuchel dhe banda e tij kanë detyrimin për të luajtur ndeshjen “super perfekte” kështu që, sonte, Bayern pritet të zbresë në fushë me lojtarët më të mirë në dispozicion:
Sommer; Pavard, Upamecano, De Ligt, Davies; Kimmich, Goretzka; Sane, Musiala, Coman; Choupo-Moting.
Nga ana tjetër, duhet thënë megjithatë se, kampionët në fuqi të Anglisë, nuk janë ai ekip që i pëson lehtë katër gola, pa harruar që kanë në majën e sulmit, një përbindësh si Erling Haaland, që golin e ka relativisht të lehtë për ta shënuar.
Guardiola pritet të tregohet i kujdesshëm përballë ish-skuadrës së tij, për të evituar ndonjë befasi, si ajo e vitit të kaluar në Santiago Bernabeu, ndaj Realit të Madridit, në gjysmëfinale.
Në mbrëmje, City pritet të aktivizojë të njëjtin formacion si në takimin e parë:
Ederson; Akanji, Dias, Ake; Stones, Rodri; Silva, Gundogan, De Bruyne, Grealish; Haaland.
/m.b. /gijotina.com
