Kryenegociatori i Kosovës Besnik Bislimi si dhe homologu i tij nga Serbia Petar Petkoviç, do takohen javën tjetër në Bruksel, ka konfirmuar zëdhënësi i Bashkimit Evropian Peter Stano.
Sipas Stanos takimi i radhës do zhvillohet me ftesë të lehtësuesit evropian dhe ka për qëllim për të “çuar përpara gjithçka që u ra dakord në Ohër si dhe për të filluar hapat e ardhshëm drejt zbatimit” të marrëveshjeve.
Takimi i javës që vjen, do jetë i pari pas takimit të Ohrit ku kryeministri i Kosovës Albin Kurti si dhe presidenti serb Aleksandër Vuçiç arritën dakordësi për planin e zbatimit të marrëveshjes mbi rrugën drejt normalizimit të raporteve të dy vendeve.
Sipas zëdhënësit Peter Stano, tani fokusi duhet të jetë në zbatim të marrëveshje s së arritur dhe kjo është kërkesë edhe e liderëve të shteteve të BE-së të cilët në samitin e javës së kaluar kërkuan nga palët që të implementojnë të gjitha marrëveshjet e dialogut.
Njëkohësisht Stano paralajmëroi se edhe në të ardhmen do ketë takime të liderëve në kuadër të dialogut por se Bashkimi Evropian do i organizoj këto në momentin e duhur. /RTK/
