Interi do të përballet sot në mbrëmje në “Luigi Ferarris” me Sampdorian për t’i dhënë vazhdimësi momentit pozitiv dhe për të forcuar pozitën si vendi i dytë i kampionatit. Inzaghi do të ketë një skuadër të kompletuar për transfertën me Joaquin Correan si mungesën e vetme, por mbi të gjitha trajneri dhe zikaltrit priten të shijojnë rikthimin në fushë nga minuta e parë të Romelu Lukakut dhe Marcelo Brozovicit.
Belgu do t’i bashkohet “binjakut” të tij në sulm, Lautaro Martinez, duke qenë kështu titullar për herë të parë që nga 4 janari në kampionat përballë Napolit dhe do të synojë që t’i bashkohet ecurisë fantastike të argjentinasit për sa i përket shkundjes së rrjetës. Ndërsa “El Toro” ka qenë i pagabueshëm para portës gjatë gjithë 2023-shit, Lukaku duhet ende të kalibrojë shënjestrën.
Goli i fundit i Romelut në kampionat daton më 13 gusht 2022, në sfidën e parë në kampionat kundër Lecces, 6 muaj më parë. Që nga ajo kohë, për 29-vjeçarin periudha ka qenë e errët për faj të dëmtimeve në kofshën e majtë dhe problemit në gju.
Sidoqoftë, dëshira për të treguar se ende mund të bëjë diferencën dhe për të fituar qëndrimin edhe për një vit në Milano duke qenë se huazimi aktual skadon në qershor, kanë qenë shtysa kryesore e belgut gjatë kësaj periudhe që ka bërë maksimumin e tij për t’u rikthyer në formë optimale.
Nëpërmjet përgatitjeve fizike dhe psikologjike të vazhdueshme falë stafit të Interit dhe trajnerëve personalë, “Big Rom” duket se ia ka dalë të rikuperojë formën fizike, siç ka treguar në minutat që ka luajtur si zëvendësues, kurse tani do të synojë t’i japë fund agjërimit të tij 6-mujor dhe të gjejë golin, i cili mund t’i rikthejë besimin dhe të ndryshojë sezonin e tij.
