Cristiano Ronaldo dhe Georgina Rodriguez do të lejohen të jetojnë së bashku në Arabinë Saudite. Ligji vendas nuk lejon që burrat dhe gratë të bashkëjetojnë në të njëjtën shtëpi pa qenë të martuar, por lëvizja e Cristiano Ronaldos dhe familjes së tij në vend, në mënyrë që CR7 të luajë për Al Nassr, do të mbulohet nga një përjashtim praktik.
Agjencia spanjolle e lajmeve EFE, intervistoi dy avokatë sauditë, të specializuar në të drejtën civile, në mënyrë anonime, të cilët shpjeguan çështjen në më shumë detaje.
“Edhe pse ligjet e mbretërisë ende e ndalojnë bashkëjetesën pa kontratë martese, autoritetet kohët e fundit kanë filluar të mbyllin sytë dhe të mos ndjekin më askënd, megjithëse këto ligje përdoren kur ka një problem apo një krim”,- tha njëri nga ata. Një tjetër tregoi, se për çështjen e bashkëjetesës, autoritetet saudite “sot nuk ndërhyjnë më në këtë çështje për të huajt, edhe pse ligji e ndalon bashkëjetesën pa martesë”,- nënvizoi ai, duke iu referuar shprehimisht të huajve që jetojnë dhe punojnë në Arabinë Saudite.
Kështu, Georgina, e cila së bashku me Ronaldon ka pesë fëmijë dhe ishte në prezantim me katër prej tyre, do të mund të jetojë në Riad me vizën e saj, të ‘sponsorizuar’ nga Al Nassr; si një vizë turistike, e vlefshme për një vit. Situata nuk është e re, pasi Al Nassr ka disa lojtarë të huaj dhe të gjithë kanë arritur të kenë partnerët me vete, edhe pse nuk janë të martuar.
