“Prestige Resort” hidhet në erë me 70 kg tritol, ndërsa zhurma e shpërthimit përpiqet të mbysë tingullin e kambanave të News 24, Balkanweb, gazetës “Panorama” dhe të “Gazeta Shqiptare”. Këto janë media në pronësi të biznesmenit Irfan Hysenbelliu, i cili është pronar edhe i resortit të shkatërruar.
Ndërkaq, terrori ndaj mediave ka synim më të gjerë. Imagjinojeni se si ndihet një qytetar i zakonshëm, kur sheh se si ia mbyllin gojën një grupi mediatik!
Këtu nuk bëhet fjalë për dëmin që i bëhet një biznesi, pasi ky do t’i marrë paratë mbrapsht në Gjykatën e Strasburgut apo të Arbitrazhit Ndërkombëtar, ashtu siç bëri vjehrri i Bashës, apo pronari i Agon TV, Francesco Becchetti. Problemi është se po kufizohet liria e shprehjes!
Pamja resortit krijon asosacion psikologjik me bombardimet nëpër luftëra apo me sulmet terroriste, ku qytetari futet në ankth dhe pasiguri. Nga pikëpamja civile, njeriu ndjen se si mund t’i rrezikohet prona e tij. Kjo shembje ka një histori të shkeljeve ligjore dhe arbitrare. Bashkë me institucionet qeveritare në këtë operacion ka marrë pjesë edhe Gjykata Administrative. U caktua që datë e gjykimit të ishte dita e hënë, ndërkohë që urdhri i kryeinspektores së IKMT-së ishte të shembej para datës 5 dhjetor 2022. Në një vend normal me sistem gjyqësor të pavarur, shembja do të duhej të pezullohej. Pra, IKMT-ja të merrte në dorë një vendim gjyqësor, qoftë për po apo për jo ndaj shembjes së resortit.
Çfarë urgjence mund të ketë, përveçse çuarjes në vend të urdhrit personal të Kryeministrit? Ai kërkon me çdo çmim dhe pa kushte të vendosë autoritetin mbi ligjin. Edhe pse për Bechetti-n populli shqiptar po paguan me qindra milionë euro dëmshpërblim të vendosura nga Arbitrazhi Ndërkombëtar, ky politikan e ka të domosdoshme të vazhdojë me këtë metodë.
Një “Becchett” i dytë, tashmë me dinamit! IKMT ka vepruar në kundërshtim me ligjin dhe afatet procedurale. Gjykata nuk merrte përsipër çështjen, sepse mungonte dokumentacioni nga inspektoriati. Hapja e gjyqit u vonua deri sa të hidhej hoteli në erë me eksploziv. Çfarë do të gjykohet tani, kur objekti nuk ekziston, është rrafshuar përtokë?!
Në këtë skenë krimi rikthehet Kryeminstri, i cili nuk i do mediat, i urren dhe i shkatërron, i poshtëron sa herë që mundet. Është një numër i madh mediash që janë mbyllur nga presioni i tij. I kujtojmë lexuesve të pyesin, pse u mbyllën mediat “Albania”, “Shekulli”, “Agon”, emisioni investigativ Públicus në Vizion Plus, pse e dëbuan emisionin “Zonë e Lirë” nga Klan TV, pse po mbyllet Ora Neës? Sa mediave online u është qepur goja, pasi janë quajtur ”kazan” nga kryeministri?! Sa gazetarë kanë marrë strehim politik në vendet e BE-së për shkak të kërcënimeve të tij?!
E megjithatë, Kryeministri gabon dhe do të dështojë në llogarinë e tij! Ai mund t’ia dalë të blejë televizionet kombëtare, t’i mbyllë portalet kritike, të korruptojë çdo zë ndryshe! Kryeministri ia ka dalë ta neutralizojë çdo shoqatë apo sindikatë të gazetarëve! Çdo biznesmen që i del kundër mund ta pësojë me tritol, si në rastin e Prestige Resort!
Po, këto po i arrin më shpejt se sa na e merrte mendja! Por liria e shprehjes është e drejtë politike universale ndërkombëtare që buron nga Artikulli XIX i kartës së OKB-së, prandaj nuk e shpëton dot as IKMT, as Gjykata Administrative. Vendin bosh të mediave vendase do ta zënë mediat ndërkombëtare! Zërin e dobët të mediave të reja që po lindin do ta fuqizojë BE dhe shoqëria civile Evropiane.
Ai ëndërron t’i lërë qytetarët pa informacion, të shohin vetëm çfarë poston për veten dhe për familjen e tij; Liria e shprehjes të kufizohet vetëm në komentimin e ndjekësve në llogarinë e tij; Gazetarët dhe mediat të kthehen në shtriga për shoqërinë.
Prandaj, o njerëz zhurma e shembjes së “Prestige Resort” është një kambanë që bie për çdo njërin prej jush!
