Portieri titullar i Kamerunit, Andre Onana, është përjashtuar nga skuadra përfaqësuese për arsye disiplinore, disa orë para ndeshjes së sotme ndaj Serbisë.
Sipas cfootmag.com, një portal kamerunas, Onana ka kundërshtuar ashpër trajnerin gjatë mbledhjes përpara ndeshjes ndaj serbëve.
Më pas, diskutimi ka kaluar edhe në pikëpamjet e ndryshme mbi stilin e lojës së ekipit dhe sjelljen në fushë të portierit, sjellje që nuk i ka pëlqyer trajnerit.
Deklarata
Pas ndeshjes, trajneri i Kamerunit deklaroi: “Kam marrë përsipër rrezikun që ta lë jashtë ekipit. Unë jam një prind për këta djem dhe duhet të garantoj disiplinë në grup. I kam thënë që të presë dhe unë do të shoh se si do të sillet në ditët e ardhshme. Duhet disiplinë dhe respekt në një grup me 26 lojtarë. Onana është portier i madh, por fokusi është te grupi. Secili nga futbollistët duhet të përshtatet me grupin. Nëse nuk përshtatesh dot, duhet të largohesh dhe të marrësh përsipër përgjegjësitë e sjelljes tënde”.
“Onana na kërkoi që të largohej nga grumbullimi dhe ne pranuam”, shtoi Rigobert Song.
