Kryetari i Partisë Demokratike, Lulzim Basha vijoi takimet në Dibër në mbështetje të Sherefedin Shehut për zgjedhjet parakohshme të 11 shtatorit. Demokratët zhvilluan takim me banorë të fshatrave Kandërr, Kishavec, Vakuf, Borovjan dhe Deshat.
Lulzim Basha bëri përgjegjëse qeverinë se në tre vjet ka shtuar hallet e shqiptarëve, ndaj sipas kryedemokratit, kjo është arsyeja që nga jugu në veri, ka nisur një bashkim i madh i shqiptarëve, për të larguar atë që ai e cilëson bandën e Edi Ramës, bëjnë me dije burimet e oranews.
Basha: Kjo është shenjë e një bashkimi të madh. Një bashkimi të madh që i tejkalon vijat politike dhe që bëhet sepse shqiptarët e kanë kuptuar se ata që kemi sot mbi krye nuk e meritojnë emrin qeveritar apo qeverisës. Janë një bandë sunduesish, hajdutësh dhe kriminelësh të cilët për popullin kanë vetëm tre alternativa; varfërinë, burgun ose emigracionin. Dhe se gjithçka ky vend ka e duan për vete.
Kandidati Shehu nga ana e tij vijoi akuzat ndaj ministrit të Gjiknuri ndërsa e konsideroi fyerje për Dibrën angazhimin në fushatë të ministrave e deputetëve të majtë që nuk kanë asnjë lidhje me zonën.
Shehu: Pse vjen Damian Gjiknuri dhe kapardiset me atë çantën krahë e qafë?! Ai ka ardhur për të studiuar kur mund të bëjë hidrocentralin tjetër. Sepse njërin e ka projektuar atje dhe prisni se do t’ju përmbysen tokat këtu. Se ai vetëm këtë punë di të bëjë bashkë me Ramën dhe Arben Ahmetajn dhe me gjithë të tjerët.
Shehu premtoi se shërbimet cilësore do të jenë prioritet I punës së tij në drejtimin e Bashkisë së Dibrës.
