Armant Beqiri 40- vjeç ka rënë në prangat e policisë ditën e sotme në Tiranë. Burime nga uniformat blu bëjnë me dije se 40- vjeçari ishte shpallur në kërkim ndërkombëtar nga Italia.
Gjykata e Torinos, Itali, e ka dënuar me 6 vjet e 10 muaj burgim, për veprat penale “Pjesëmarrja në organizatë kriminale” dhe “Trafikimi i lëndëve narkotike”, parashikuar nga Kodi Penal i Italisë.
Përmes njoftimit zyrtar policia sqaron se arrestimi i trafikantit të drogës është bërë në kuadër të operacionit “Torino”. Pritet të merret në pyetje për të zbuluar personat e tjerë të përfshirë në organizatën kriminale dhe veprimtarinë e tyre për trafikimin e drogës në Itali.
Interpol Tirana, në bashkëpunim me Interpol Roma, vijon procedurat për ekstradimin e këtij shtetasi drejt Italisë.
