Avokati Dorian Matlija ka folur për vdekjen tragjike të 32 vjeçarit, Lear Kurti, i cili ndërroi jetë në duart e efektivëve të komisariatit nr.3 të Policisë së Tiranës. Në një lidhje me emisionin “Të Paekspozuarit”, Matlija tha se ngjarja mund të jetë manipuluar. Matlija tha se policia abuzon shpesh me shoqërimet për verifikim dhe se kjo praktikë duhet të marrë fund. Ai u shpreh se janë dy rrethana kur mund të ndalohet një person, kur dyshohet mbi kryerjen e një vepre penale dhe për të verifikuar identitetin. Për këtë të fundit, avokati tha se efektivët abuzojnë shpesh.
“Ajo që po shoh deri tani, sigurisht policisë i ka mbetur në dorë. Është praktikë ndërkombëtare, që kur policia e ka personin të izoluar mban të gjithë përgjegjësinë dhe prezumohet se ka rol dhe duhet hetuar. Janë dy rrethana kur mund të ndalohet një person. Kur dyshohet mbi kryerjen e një vepre penale, por duhet dyshim i arsyeshëm. Ka edhe një rrethanë tjetër, që është arsyeja për të verifikuar identitetit. Një person mund të merret me vete për tu identifikuar. Kjo është tepër e shpeshtë për policinë dhe të mbajnë edhe 10 orë vetëm për verifikim. Ky është problem shumë i madh sepse shumë njerëz ndalohen për këtë. Ky është abuzim shumë i madh që duhet të marrë fund. Ai nuk është ndaluar sepse ka qenë para një biznesi. Është marrë për verifikim dhe është bërë në mënyrë abuzive,”- tha Matlija ndër të tjera.
