Është drejt përfundimit, restaurimi i kopshteve dhe çerdheve të Tiranës, ndërkohë që Bashkia deklaroi nisjen e ndërtimit të 20 shkollave të reja në kryeqytet. Kryetari i bashkisë së Tiranës, Erjon Veliaj, tha sot se i gjithë angazhimi do të fokusohet tek investimet me standard dhe zgjidhja e problematikës së mësimit me dy turne.
Veliaj, inauguroi ambientet e reja të një kopështi të restauruar ën Kombinat nga ku theksoi se tashmë puna e Bashkisë do të përqendrohet tek shkollat, për t’i thënë fund problemit të mësimit me dy turne.
Erion Veliaj: “Kemi edhe 4 kopshte, të cilat do t’i realizojmë deri në fund të javës…. Me të mbaruar procesin e kopshteve, do të vazhdojmë me shkollat. Shkolla e dytë, nga 20 shkollat e reja që po bëjmë në Tiranë, sapo ka filluar në Kombinat, pra pas “Hoxha Tahsinit”, është shkolla “Betim Muço”. Pastaj do të vazhdojmë me 18 shkollat e tjera, për t’u siguruar që herën tjetër kur të mblidhemi në prag shkollor, jemi duke zgjidhur përfundimisht çështjen e mësimit me dy turne”, tha Veliaj.
