Kreu i Sindikatës së Pedagogëve të Shqipërisë, Sandër Kovaçi, u shpreh se lëvizja e pedagogëve do të vijojë deri në arritjen e qëllimit final duke paralajmëruar bojkot të mësimit për ditën e hënë. Kovaçi kërkoi solidarizimin e të gjithë stafit akademik, për të cilët tha se pavarësisht presioneve, ka mënyra të ndryshme për t’ju bashkuar protestave.
Gjithashtu ai shtoi se nisja e vitit akademik do të bëhet në datën 17, që sipas tij, në orën 08:00-10:00 do të bëhet prezantimi i studentëve të rinj dhe më pas pedagogët do të dalin për të protestuar në oborret e fakulteteve.
Shenjë pozitive sipas tij, është fakti që Presidenti i Republikës, Bajram Begaj, ka kërkuar të njihet me problemet e pedagogëve dhe me ecurinë e zgjidhjeve të tyre.
“Edhe ata që ju bashkangjitën protestës, edhe ata që do të na bashkangjiten në datën 17 ju falenderojmë shumë.Ne duhet të insistojmë në arritjen e qëllimeve të kësaj proteste. Ne nuk kërkojmë që ta prishim datën e fillimit të vitit të ri akademik. Ditën e hënë nga ora 8-10 do të bëhet prezantimi i studentëve të rinj. Në orën 10:00 do të jemi aty me studentët për t’u sqaruar atyre se përse lëvizja jonë është edhe lëvizja e tyre. Në orën 10:00-12:00 i gjithë personeli i fakulteteve do të jetë në oborrin e universiteteve. Të gjithë kolegët duhet të jenë solidar me datën 17 e cila do të përsëritet më 18, më 19 e kështu me radhë, deri në arritjen e qëllimit. Edhe Presidenti i Republikës ka kërkuar të njihet me problemet tona. Kjo është një shenjë pozitive. Një shenjë tjetër pozitive është ndërgjegjësimi i të tjerëve. Kryeministri do ua mbyllë degët ku ka për t’i mbyllur, mos mendoni që të ketë mëshirë për ju se nuk dolët në protestë. Jam shumë përulës për mbështetjen që i keni dhënë kësaj lëvizjeje”, u shpreh Kovaçi.
