Personi në foto është Fatjon Murati, i cili u ndalua mbrëmjen e djeshme nga policia e Tiranës. Ai rezultonte i shpallur në kërkim policor, ndërsa në makinë lëvizte bashkë me Endrit Doklen.
Ata u ndaluan mbrëmjen e djeshme nga policia e Tiranës në një aksion blic, ku bashkë me ta ishte në makinë dhe Gentjan Reçi. Dokle ishte shoqëruar se po lëvizte me Fatjon Muratin, në kërkim nga policia për armëmbajtje pa leje, teksa Reçi ishte shofer.
Murati ishte i shpallur në kërkim nga policia, pasi emri i tij doli në masakrën me tre të vrarë në Fushë-Krujë dhe ka qenë një nga personazhet që është kërkuar nga Prokuroria e Kurbinit për t’u marrë në pyetje.
Prokuroria e Krujës kërkoi marrjen në pyetje të disa personave në lidhje me atentatin e ndodhur në zonën e njohur si mbikalimi i Fushë Krujës, ku mbetën të vrarë tre të rinjtë Brilant Martinaj, Besmir Hoxha dhe Diklen Vata. Mes emrave që kërkon organi i akuzës të pyeten ishin Gentian Reçi, djali i ish-policit të vrarë Xhelal Reçi, numri dy i bandës së Durrësit Endrit Dokle, në lidhje krushqie me ish-policin e vrarë, dhe nipi i deputetit socialist Rrahman Rraja, Ramazan Rraja.
Masakra e Fushë Krujës ndodhi më 17 korrik, ku mbetën të vrarë Besmir Hoxha, Brilant Martinaj dhe Diklen Vata. Disa persona kanë ekzekutuar në mënyrë makabre 3 të rinjtë duke djegur edhe makinën ku ata po udhëtonin. Edhe pse ka një listë me të dyshuar, sërish nuk ka asnjë të arrestuar për ngjarjen në fjalë.
