Gjykata e Posaçme ka zbardhur ditën e sotme vendimin për grabitjen e Rinasit ku ka dhënë dënimin për dy vëllezërit Çala. Sipas Gjykatës, Klement Çala do të dënohet me 20 vit burg, ndërsa Eldi Çala me 17 vite burg.
Dy të dënuarit do ta vuajnë dënimin në një burg të sigurisë së lartë sipas Gjykatës. Anëtarët e tjerë të grupit, Oltian Veseli, Renaldo Sula, Saimir Çela, Elton Pikli dhe i penduari i drejtësisë Alkond Begasi janë dënuar me nga 17 vite burgim.
Dy vëllezërit nga Elbasani, të akuzuar si personat kryesorë që morën pjesë në grabitjen spektakolare brenda aeroportit të Rinasit, u arrestuan në vitin 2020, pas 3 vitesh kërkim. Mbi 300 forca policie nga Tirana, Durrësi, RENEA dhe ato FAST morën pjesë në megaoperacionin për kapjen e tyre.
Gjurmimi i tyre u bë me metoda speciale të hetimit, pasi shpesh herë ata ndryshonin edhe vendbanimet. Në momentin e ndërhyrjes, Klement dhe Eldi Çalës iu sekuestruan 3 pistoleta, dy makina dhe dy motorrë, si dhe një shumë prej më shumë se 100 mijë eurosh.
Sipas policisë, paratë e gjetura të fshehura në pjesë të ndryshme të makinës, brenda garazhdit të vilës ku ata jetonin dyshohet të jenë ato të grabitura nga barku i avionit në 9 Prill të 2019-ës, ku mbeti i vrarë Admir Murataj, organizator i grabitjes.
