Prokuroria ka dalë në përfundimin se i shumëkërkuari Ervis Martinaj është ‘shitur’ nga një vajzë. Në dokumentet e publikuara nga Lapsi.al konfirmohet edhe njëherë pista për vrasjen e Martinajt, dosje që ka mbajtur ‘peshë’ institucionet e drejtësisë shqiptare.
“Më datë 10.08.2022 shërbimet e policisë giyqësore te DVP Lezhe, dhe të Komisariatit të Policisë Kurbin, kanë marrë informacion nga një burim konfidencial se shtetasi Ervis Mustafa Martinaj i datëlindjes 6.10.1982, lindur në Burrel dhe banues ne Fushë-Kuqe, Kurbin, dyshohet se është rrëmbyer dhe ekzekutuar nga kundërshtarët e tij, pasi është tradhëtuar e nxjerrë në pritë nga një femër në proces verifikimi. Sipas të dhënave të administruara në rrugë operative, dyshohet se shtetasi Ervis Martinaj, mund të jetë rrëmbyer në qytetin e Durrësit dhe më pas të jetë vrarë, nga persona të paidentifikuar “-shkruan prokurori në dosje.
Dokumenti që jep versionin zyrtar të prokurorisë mbi fatin e 40-vjeçarit, shkruan se në kallëzimin penal, njësoj si xhaxhai edhe babai i Ervis Martinajt përmendin Indrit Doklen si të dyshuarin kryesor për ngjarjen.
“Shprehet se dyshon se zhdukja e tij ka lidhje me grupe kriminale dhe individë që i ka përfshirë Dumani, ku në këtë histori është edhe Indrit Dokle, i cili mund të ketë organizuar gjithçka lidhur me zhdukjen e nipit, Ervis Martinaj. Në vijim në lidhje me kallëzimin në fjalë është pyetur edhe vetë babai i Ervisit, shtetasi Mustafe Martinaj. Ai ka deklaruar se për herë të fundit me djalin ka kontaktuar një njeriu i tij i afërt, në orën 19.30 të datës 09.08.2022. Pas kësaj ore ai nuk ka qenë në linjë. Zhdukja e tij sipas mendimit të tij, i takon orës 19.30 deri në orën 22.00 të datës 09.08.2022. Deklaron se nuk ka dijeni për vendin dhe njerëzit gë kanë marrë pjesë dhe se ku. I afërmi që ka kontaktuar djali i tij, nuk ndodhet në Shqipëri dhe me sa ka dijeni djali nuk ka numër shqiptar. Thekson se zanafilla e kësaj ngjarje lidhet me shpalljen e Ervisit në kërkim për krime të trilluara nga Dumani. Sqaroj se ndërprerjen e komunikimit dhe të zhdukjes se djalit tim kam marrë vesh nga i afërmi im i cili jeton jashtë shtetit. Shprehet se dyshon se Ervisit mund t’i ketë ndodhur diçka e keqe nga grupe kriminale” thuhet në dosje.
Kjo pistë u publikua një natë më parë në emisionin “Në shënjestër”. Pista e nxjerrjes së mundshme në pritë është raportuar nga gijotina.com që më 26 gusht. Duke mos marrë përsipër konfirmimin e asnjërës prej pistave, gijotina.com theksonte se nxjerrja në pritë ishte pista e parë që kishte Prokuroria mbi tavolinë. Ervis Martinaj ishte shpallur në kërkim, në kuadër të operacionit “Plumbi i Artë”, pasi i penduari i drejtësisë Nuredin Dumani, tha se i kishte ofruar një ‘çek të bardhë’ në këmbim të ‘kokës’ së Indrit Dokles. Por, në 9 gusht, ai u zhduk pa gjurmë. Alarmin e ngritën familjarët e Martinajt dhe tashmë prokuroria po heton për rrëmbim personi dhe inskenim. Lidhur me këtë çështje, ka pasur edhe reagime nga kryeministri Edi Rama. Ai paralajmëroi edhe zhvillime, duke u shprehur se Policia e ka një përgjigje, por shumë shpejt do dalë me prova.
