Deputeti i Partisë Demokratike, Dashnor Sula ka akuzuar kryeministrin Edi Rama se po e kthen Shqipërinë në “Republikën e Pleqve”. Përmes një mesazhi në “Facebook”, Sula theksoi se të enjten denoncoi shpopullimin e Shqipërisë nga Kuvendi.
Sipas demokratit, koha nuk pret për retorikë boshe e propagandë, ndërsa shtoi se Rama duhet të ndërmarrë menjëherë hapa konkrete për të siguruar rendin në vend. Ai gjithashtu përmend edhe shkrimin e prestigjiozes britanike “The Telegraph” që shkruan se gati 4,700 emigrantë kanë kaluar tashmë Kanalin këtë muaj, duke e çuar totalin deri më tani këtë vit në 29,716 shqiptarë.
Postimi i Sulës:
Kryeministri Rama dhe qëllimi tij për ta kthyer “Shqipërinë në Republikën e Pleqve”
Në seancën e të Enjtes që shkoi, denoncova me të dhëna zyrtare shpopullimin e Shqipërisë. Përpos numrit të lartë të të rinjve dhe moshës vitale për punë që po emigrojnë drejt vendeve të BE si Gjermani, Francë apo Belgjikë, një destinacion shumë i lakmuar është bërë edhe Britania e Madhe. Të rinj, nëna me fëmijë të mitur kanë dalë në video teksa rrezikojnë jetë në Kanalin e Lamanshit drejt Anglisë.
Së fundi, një nga mediat prestigjoze britanike “The Telegraph”, shkuan në një artikull të saj se “është vlerësuar se deri në fund të këtij muaji mund të kenë arritur në Britaninë e Madhe rreth 9 mijë shqiptarë. Në përgjithësi, gati 4,700 migrantë kanë kaluar tashmë Kanalin këtë muaj, duke e çuar totalin deri më tani këtë vit në 29,716, krahasuar me 28,526 për të gjithë vitin 2021 dhe 8,400 në 2020”. E në një kohë që ky fenomen nuk ndalet, nuk do ishte çudi që deri në fund të vitit të kemi një dyfishim të ikjeve krahasuar me një vit më parë.
Kryeministri i propagandës na paska dhënë edhe një intervistë për “The Telegraph” ku i ka kërkuar të mos largohen por të investojnë parate e tyre në Shqipëri në turizmin rural. Kryeministri flet sikur ka ardhur në pushtet sot dhe jo sikur ka 10 vite në krye.
Do mbështesim të rinjt thot Kryeministri por çdo grant shkon për miqtë e qeverisë, për miqt e mazhorancës.
Mos u largoni thotë Kryeministri, por institucionet shtetërore që drejtohen nga të besuarit e tij kanë 9 vite që lejojnë pastrimin e parave të drogës dhe korrupsionit duke shkaktuar kështu falimentimin e bizneseve që mbijetojnë me punë të ndershme.
Mos ikni thotë Kryeministri, por në 9 vite e ka bërë Shqipërinë më keq se Kolumbia. Siguria e rendi publik është zero. Vetëm mbrëmë pati dy ngjarje kriminale. Një 19-vjeçar u ekzekutua me breshëri plumbash. Ndërkohë në Korçë u plagos një tjetër.
9 vite në pushtet kjo mazhorancë ka dëshmuar se nuk ka luftuar krimin e organizuar dhe korrupsionin, por ka flirtuar me to, e në disa raste si me inceneratrët edhe ka bashkëpunuar.
Koha nuk pret më për retorikë boshe e propagandë. Z. Rama duhet të ndërmarrë menjëherë hapa konkrete për të siguruar rendin në vend, të ndalojë eksodin e madh sepse ndryshe Shqipëria do quhet ndryshe “Republika Pleqve”.
