Ministrja e Energjisë dhe Infrastrukturës Belinda Balluku ka vijuar këshillat për kursimin e energjisë në Kuvend, duke theksuar se kjo është një fushatë që po bëhet në të gjithë botën.
Ajo u shpreh se nuk merret ajo me hartimin e këtyre fushatave, ndërsa shtoi se të gjithë janë të lirë t’i lajnë si të duan rrobat e tyre.
Megjithatë, ajo nënvizoi se drita ndezur apo dera e frigoriferit hapur harxhojnë më shumë energji elektrike dhe për ata që kalojnë fashën e vendosur do të ketë faturim më të shtrenjtë.
“Si mund të dalësh këtu zonjë dhe të hedhësh vrer. Flit me fakte se je zonjë. Dil këtu dhe thuaj atë që ke për të thënë. Unë nuk merrem me temperaturat e larjes së rrobave sepse i laj sipas mundësisë sime. Nuk kam folur kurrë por kam shpërndarë një fushatë për sensibilizimin e qytetarëve për kursimin e energjisë. Nëse e le frigoriferin hapur harxhon më shumë energji.
Edhe nëse le dritën ndezur. Kur kam folur unë për larjen e rrobave. Se nuk kam kohë. Unë laj rrobat e mia ashtu si di në 12 të natës kur më del koha. Detyra ime është të garantoj furnizim me energji elektrike pa ndërprerë. Nuk mund të talleni me batuta. Ne do vazhdojmë të ofrojmë energji elektrike dhe të ruajmë qytetarët për një familje për të kryer të gjithë operimet.
Me fashën e vendosur do paguajnë më shumë ata që duan të krehin flokët dhe të lajnë rrobat me 90 gradë. Ne këshillojmë. Janë fushata. Që bëhen në të gjithë botën. Edhe në Gjermani. Jo fushata por vendimmarrje në Zvicër për kondicionerin. Jo mohoni që ka krizë? Ky është një moment kritik. Nuk hedhim dot shi nga qielli. Energjia elektrike prodhohet nga hidrocentralet. Çmimet e importit nuk i vendosim ne. Del aty dhe akuzon se ministrja ka thënë lani rrobat. Jo nuk e kam thënë”, tha Balluku.
