E pyetur se pse ka mospërputhje të çmimeve të vendosura në bursë me vendimet e bordit, ministrja e Financave Delina Ibrahimaj e mohoi në mënyrë kategorike duke thënë se është supozim i pabazë.
Ibrahimaj u shpreh se të gjitha vendimet e bordit merren në bazë të një formule ligjore, duke shtuar se në rastet kur bursa ka rritje të çmimit të naftës, mbledhjet shtyhen.
“Për akt normativ u përgjigja dhe paketa e dytë do të anoncohet në shtator, me miratimin e VKM-së, sa i përket bordeve, unë besoj që ajo që thatë është supozim, jo i bazuar në realitet. Bordi përcakton çmimet e naftës së rafinuar dhe në asnjë rast nuk është mbledhur në kundërshtim me bursën, madje e kundërta, pasqyrim i uljes së çmimeve në bursë për produktet që tregtohen në vend, ne madje shtyjmë mbledhjet kur kemi rritje në bursë. Bëhet formula bazuar në ligj, mund të uleni në një takim të veçantë ku mund të analizojmë të gjitha vendimet e bordit, lëvizjet e bursës”, tha ministrja.
Kujtojmë se jo më larg se para 5 ditësh, çmimi i naftës në bursa shënoi rënie duke zbritur në 93 dollarë për fuçi dhe 900 dollarë për ton, në nivelet e para luftës, ndërsa bordi i transparencës e rriti çmimin për të dytën herë radhazi në tregun vendas, duke e çuar atë në 227 lekë për litër.
