Policia e Durrësit, pas disa orësh kërkime, bënë të mundur lokalizimin dhe kapjen e individit me inicialet Sh. S, 48 vjeç, banues në Mazrek, Tiranë. Kapja dhe arrestimi i tij u bë për arsye se ky shtetas, gjatë kohës që ka qenë në plazhin e quajtur “Gjiri i Lalzit”, ka hequr me forcë nga një vendrojë detare, një flamur të shtetit turk, të cilin më pas e ka hedhur në mënyrë demonstrative në det.
Ky veprim është filmuar me celular dhe më pas është postuar në rrjetet sociale, nga ky shtetas. Shërbimet e policisë e shpallën fillimisht në kërkim qytetarin me inicialet Sh. S., pasi ishte fshehur pas ngjarjes.
Pas kërkimeve nga policia u bë i mundur lokalizimi, kapja dhe arrestimi i shtetasit Sh. S., për veprat penale “Nxitja e urrejtjes ose grindjeve” dhe “Prishja e rendit dhe qetësisë publike”.
Materialet i kaluan Prokurorisë Durrës, për veprime të mëtejshme.
