“Mazhoranca ka futur në mënyrë tinzare, amandamentin për kufizimin e lirisë së medias tek ligji i Prokurorisë Speciale por edhe tek ai i prokurorisë së zakonshme”
Amandamenti që kufizon lirinë e medias, është përfshirë edhe në ligjin e zakonshëm të prokurorisë. Lajmi bëhët i ditur nga përfaqësuesi i PD-së në Komisionin e Reformës në Drejtësi, Oerd Bylykbashi. Përmes një mesazhi në facebook, Bylykbashi sqaron se opozita nuk ka qënë në dijeni të amandamentit për median i përfshirë në ligjet e reformës në drejtësi. Përmes një mesazhi në facebook, Bylykbashi, sqaron se mazhoranca e ka hartuar këtë amansdament në mungesë të plotë transparence dhe me qëllimin e caktuar që të mbysë lirinë e medias në Shqipëri. Bylykbashi thotë se ky amandament nuk do të kalojë pasi sipas tij nuk ka as mundësi teorike të miratohet.
“Kjo mazhorancë e ka tmerr lirinë e medias, si etërit e 1944 që i frymëzojnë. Para tre ditësh sollën në komision ligjin për Prokurorinë Speciale të cilin e kishin hartuar në errësirë të plotë, me të cilin media denohej nëse tentonte të bënte transparencë, duke e quajtur “ndikim të papërshtatshëm”! Opozita dhe media e denoncoi menjëherë. Ai nen nuk kalon!
Por këta nuk heqin dorë nga kërcënimi mbi median! Mesa duket, të njejtin kërcënim e kanë futur tek ligji i Prokurorise së zakonshme; ligj tjetër ky. Edhe këtë e kanë gatuar të vetëm në komision kur u mblodhën para miratimit të amendamenteve kushtetuese, atëherë kur Opozita nuk ishte e pranishme. Si çdo gjë tinzare, edhe kjo është bërë në fshehtësi.
Ky nen i ri që vret lirinë e medias nuk ka asnjë shans (as teorik) të kalojë! Opozita do ta kundërshtojë këtë tentative të re të mazhorancës!”, shkruan Bylykbashi.
