Edhe pse në bursa çmimi i naftës ka rënë ndjeshëm, në vendin tonë vazhdon të ketë koston më të lartë. Në vendimin e fundit Bordi i Transparencës uli çmimin vetëm me një lekë, çka u konsiderua tallje nga qytetarët, bizneset dhe ekspertët. Në lidhje me këtë çështje ka reaguar edhe Konfindustria, e cila kërkon që bordi të shkrihet sa më parë, pasi po mbron vetëm interesat e pikave të karburantit.
“Konfindustria i kërkon vendimmarrjes politike të ndërmarri nismën ligjore për shkrirjen e menjëhershme të Bordit të Trasparencës/BT shoqëruar me themelimin e Entit Rregullator të Karburanteve/ERK. ERK të krijohet si institucion i përhershëm, profesional dhe në varësi të Kuvendit të Shqipërisë, sipas modeleve rajonale të provuara të suksesshme. BT është institucion i përkohshëm, në varësinë e qeverisë dhe përbëhet në një akt te qartë konflikti interesi në gjysmën e anëtareve nga subjektet, që duhet të kontrollohen. Konfindustria vlerëson, se Bordi i Transparencës në gjithë vendimmarrjet e tij ka vepruar në dëm të interesit publik, duke favorizuar qartësisht kartelin e karburanteve, sidomos në çmimet e tregut të shumicës dhe tarifat e operacioneve portuale dhe depozituese, si dhe shtimin e sforcuar të të ardhurave publike me pasoja të rënda për qytetarët, biznesin dhe ekonominë kombëtare në afatgjatë.
Rasti më i qartë i vendimmarrjes klienteliste të Bordit të Transparencës është i datës 6/8/2022. Me një akt qartësisht sfidues ndaj interesit publik dhe pa asnjë shpjegim teknik shoqërues nga BT çmimi i naftës u ul me vetëm 1 lek/litër, të paktën 20 here më të vogël, sesa bëhej e mundur nga vlerësimet krahësimore të rënies së çmimeve në bursat ndërkombëtare”, thuhet në reagim.
Ndërsa përcaktohet më tutje se, çmimi i naftës me pakicë duhej të ishte poshtë nivelit 200 mijë lekë për litër.
