Ka nisur seanca e jashtëzakonshme e Kuvendit për të votuar tre dekretet e Presidentit Bajram Begaj, lidhur me ndryshimet e bëra beftas në qeveri nga ana e kryeministrit Edi Rama.
Deputetët do të votojnë dekretet për shkarkimin e Arben Ahmetajt nga posti i zv/kryeministrit dhe zëvendësimi i tij me ministren e Energjitikës, Belinda Balluku, por edhe vendosjen e Majlinda Dhukës në krye të grupit negociator për bisedimet për anëtarësim me BE dhe në postin e Ministres së Shtetit.
Në këtë seancë parlamentare nuk pritet të ketë debat, pasi është rrëzuar kërkesa për mocion debati nga ana e kreut të Grupit Parlamentar të PD-së, Enkelejd Alibeaj.
Deputetët demokratë pasi kanë marrë vesh se kërkesa për debat është rrëzuar, kanë menduar të shfrytëzojnë 2 minutat e përcaktuara për ta për procedurë, që të hapin debat lidhur me ndryshimet në qeveri.
Ndërkohë, mësohet se Belinda Balluku dhe Majlinda Lluka do t’i drejtohen Presidencës për të bërë betimin në detyrë menjëherë pas votimit në Kuvend të dekreteve.
