Kreu i Grupit Parlamentar të Partisë Demokratike, Enkelejd Alibeaj, ishte në Durrës ku në një tryezë diskutoi rreth Reformës Territoriale. Gjatë takimit konsultativ, Alibeaj u shpreh se pushteti vendor është larg interesave të qytetarëve.
“Në Durrës për të konsultuar qëndrimin tonë mbi Reformën Administrativo-Territoriale. Qarku Durrës, edhe pse me mbi 10% të të gjithë popullsisë së vendit, ka vetëm 3 Bashki. Masakra territoriale më e madhe në 2014 është bërë me këtë qark. Pushtet vendor larg interesave të qytetarëve, i orientuar nga interesa korruptive e klienteliste. Një Bashki me superterritor si ajo e Durrësit, që fatkeqësisht është qeverisur vetëm me betonizim mbi rrënojat historike dhe brigjet e lakmueshme. E painteresuar tu shërbejë qytetarëve, e paaftë tu shërbejë qytetarëve, por ama pjellore në skandale kriminale e korruptive. Qytetarët në Manzë, Ishëm e Sukth të lënë pa mbrojtje dhe të harruar, ndonëse të shumtë në numër. Një Bashki historike si ajo e Shijakut, mbi historinë dhe burimet zhvillimore të të cilës shtohet pluhuri i harresës çdo ditë e më shumë. Një përzierje pa kuptim midis Fushe Krujës dhe Krujës, duke zbehur identitetin kombëtar të kësaj të fundit.”
Gjithashtu, gjatë fjalës së tij Alibeaj është shprehur se një pushtet vetëqeverisës duhet të jetë ekonomikisht i vetëmjaftueshëm, dhe se duhet të ruajë identitetin, traditën, historinë dhe lidhjet e brendshme komunitare.
“Një pushtet vetëqeverisës duhet të jetë ekonomikisht i vetëmjaftueshëm, porse duhet të ruajë identitetin, traditën, historinë dhe lidhjet e brendshme komunitare. Së bashku me kolegun Xhaferraj dhe anëtaret e komisionit Andia Ulliri, Merita Bakiu dhe bashkë-kryetaren e komisionit znj Cupi, dhe ekspertin e komisionit z. Roland Bejko u diskutua për sugjerimet dhe nevojat që duhet të mbrohen në komisionin e Reformës Administrative Territoriale. Që qytetarëve t’u dëgjohet zëri dhe Reforma të jetë vetëm në shërbim të tyre!”
