Pas vdekjes së 17-vjeçarit në landfillin e Sharrës ka reaguar edhe Avokati i Popullit, i cili ka nisur një hetim administrativ për të verifikuar nëse institucionet shtetërore përgjegjëse kanë monitoruar trajtimin e të drejtave të punonjësve në kompaninë private të riciklimit të mbetjeve në fushën e Sharrës, ku Ardit Gjokli, humbi jetën. Totozani ka theksuar se mbështet dhe inkurajon Prokurorinë e Tiranës që të vëre para ligjit përgjegjësit e ngjarjes.
“Avokati i Popullit, z. Igli Totozani, shpreh tronditjen më të thellë për ngjarjen e rëndë të vrasjes dhe më pas braktisjes së 17 vjeçarit, Ardit Gjokli, në fushën e mbeturinave në Sharrë. Z. Totozani i shpreh ngushëllimet më të ndjera familjarëve të të riut që humbi jetën, pa mundur të ketë shansin që ta shijojë atë, si bashkëmoshatarët e tij.
Avokati i Popullit, z. Igli Totozani, mbështet dhe inkurajon Prokurorinë e Tiranës, që të zhvillojë një hetim të hollësishëm dhe gjithëpërfshirës, për të gjetur dhe për të vënë përpara ligjit autorët dhe përgjegjësit e këtij akti tragjik.
Avokati i Popullit deklaron se ka nisur një hetim administrativ për të verifikuar nëse institucionet shtetërore përgjegjëse kanë monitoruar trajtimin e të drejtave të punonjësve në kompaninë private të riciklimit të mbetjeve në fushën e Sharrës, ku 17 vjecari Ardit Gjokli, punonte prej disa kohësh. Pjesë e hetimit të ekspertëve të Avokatit të Popullit është kërkesa për informacion drejtuar institucioneve shtetërore të përfshira, që kanë në kompetencën e detyrave të tyre funksionale: verifikimin e zbatimit të kodit të punës për punonjësit, kushtet e kontratës, pagesën e sigurimeve, si dhe monitorimin e zbatimit të kushteve të sigurisë në punë nga ana e firmës private që ushtron aktivitetin në fushën e mbledhjes së mbeturinave në Sharrë.”
