Deputeti i Partisë Socialiste, Erion Braçe, ka folur me tone kritike ndaj qeverisë në lidhje me situatën e bujqësisë në vend. Gjatë një interpelance të thirrur prej tij në Kuvend, me ministren e Bujqësisë Frida Krifca, Braçe evidentoi rritjen e kostove të prodhimit nga fermerët dhe kërkoi nga qeveria të publikojë ndihmën e dhënë për bujqit në këtë situatë.
Ai nxori emrat e grumbulluesve që blejnë me një çmim minimal shalqirin në zonën e Myzeqesë dhe në rajon e shesin disa fish më shtrenjtë.
“Heshtja për një kulturë aq masive sa është shalqiri dhe që po zë një peshë shumë të rëndësishme të të gjithë eksportit nga Shqipëria në të gjithë Europën është e papranueshme. Kam monitoruar të dielën deri të martën që ishin ditët e krizës së shalqirit. Sot është dita e të vërtetës, pas një deklarate të gjatë të grumbulluesve që po i dilnin për zot dhe po i shpëtonin jetën bujqërve dhe që unë po ua shkatërroja e kështu me radhë. “Tomato Al” ka shitur ditën e dielë me 23.8 lekë. Të gjithë ata që na dëgjojnë e dinë që të dielën është mbledhur shalqiri vetëm me 9 deri në 10 lekë. “Romir Shpk” është më interesanti, ka shitur të dielën 220 tonë shalqi në Kosovë, e ka mbuluar me shalqi. Me 15.5 lekë. “LB Fruits 2006”, ka shitur në Hungari me 40 lekë. U vjen gjynah këtyre njerëzve që bujqve shkojnë ua marrin me 8-9 lekë për kg dhe për vete e shesin 40 lekë për kg. “Fraeno” e ka mbledhur në Kosovë me 12 cent dhe 14 cent në Bosnje, ndërkohë që e ka blerë me 8 lekë. “Doni Fruits” ia shet vetes njëherë me 12 cent, njëherë me 11 cent”, tha deputeti socialist.
