Armando Kazma ka ndërruar jetë pasditen e sotme në Sarandë pasi u godit nga tenda mbrojtëse e një kalçeto. 22-vjeçari pësoi dëmtime për shkak se era e fortë rrëzoi tendën mbrojtëse në fushën sportive ku ai po qëndronte. Për këtë ka reaguar deputetja e Partisë Demokratike, Ina Zhupa, e cila ka ngushëlluar familjen për fatkeqësinë dhe se tregon që i riu ka bashkëpunuar me të në fushatën e zgjedhjeve të 25 prillit.
“Nuk dua ta besoj, nuk doja ta shkruaja kurrë këtë status, dhimbje pafund. Një nga djemtë më të mirë të Sarandës, një djalë i zoti, një djalë i qeshur, punëtor, i pari në fushatën elektorale në krye të punëve, i fundit u largua deri sa numëroi votën e fundit. Një djalë i shkolluar, një djalë i urtë, nga një familje e jashtëzakonshme. Edhe të gjitha këto janë pak për të përshkruar Armandon që sapo mora vesh që u nda nga jeta në moshën 22-vjeçare, aksidentalisht nga një shtyllë kalçeto që u rrezua nga stuhia me shi. O zot jepi forcë familjes së tij për këtë dhimbje të papërshkrueshme, jepi forcë njerëzve të afërt. I paharruar Armando, lotët nuk do thahen kurrë për ty. Parajsa ka engjëlli e vet, ne kemi dhimbjen që po na plas zemrën. Do të mbaj mend të qeshur gjithmonë” – shkruan Zhupa në facebook.
Kujtojmë se 22-vjeçari fillimisht i riu u dërgua në spital për të marrë ndihmën e parë mjekësore por nuk mundi t’u mbijetojë plagëve të marra.
