Rreth 14 familje në Kombinat në afërsi të lagjes “Kroi i Banës” këtë të shtunë kanë mundur të furnizohen me ujë të rrjedhshëm në çezmat e tyre, pas 11 ditësh në pritje.
“11 ditë pa ujë.”
“Na qeshi buza kur pamë ujin, fluturuam. Çfarë do bënim ne pa ujë?!”
Banorët janë të kënaqur me pak. Ata kërkojnë që uji minimalisht tu vijë me orar tre herë në ditë.
“Sot na erdhi pak ujë, jemi prapë të kënaqur me pak.”
“Me aq sa erdhi sot jemi të kënaqur.”
“Të ndërrojë manovratorët dhe ujë ka plot.”
Megjithatë janë të pasigurt, teksa shprehen se situata e mungesës së ujit mund të përsëritet sërish.
“E kemi pak frikën.”
“Më mirë të më vrisje dje sesa shkova dhe mbusha ujë tek ai tjetri, uji është jeta.”
Të mërkurën e datës 30 qershor, banorët u ngritën në protestë për shkak të mungesës së ujit pasi duhet të bënin disa minuta në këmbë për të mbushur ujë të mjaftueshëm për nevojat e shtëpisë.
Por pas interesimit të medias dhe vëzhgimit nga grupet e xhirimit, Ujësjellës Kanalizime Tiranë u vu në lëvizje për të rikthyer ujin te banorët e kësaj zone.
Megjithatë shprehen se nëse situata do përsëritet do të vijojnë protestat pasi kjo lagje është tërësisht në harresë.
Mungesa e rrugës së shtruar dhe ndriçimi gjatë natës vijojnë të mbeten shqetësim për ta.
“Do bëjmë gjithçka, do mblidhemi të gjithë dhe do shkojmë te Ujësjellësi”.
