Partia Demokratike bën përgjegjëse Ministrinë e Bujqësisë për përhapjen e sëmundjes së gjedhit në verilindje të vendit.
Deputetja e qarkut të Kukësit, Mimoza Hajdarmataj, nga rrethi i Hasit ku u takua me disa fermerë të zonës tha se Qeveria dhe Ministria e Bujqësisë duhet të reagonin më herët në parandalimin e dermatozës nodulare.
Ajo i bëri thirrje Ministrit Panariti për dërgimin e dozës së vaksinimit në zonën e Hasit, pasi kjo sëmundje është përhapur në të gjithë krerët e bagëtive.
Hajdarmataj: “Jemi një nga zonat e varfra të vendit që mbahet nga blegtoria. Kemi një ministri inegzistente që nuk po ndihmon fermrët dhe nuk po i gjindet fermerëve kur hallin e kanë tek dera. Ministri ka ardhur tek zona juaj por a po vijnë vaksinat?! Ne jemi këtu që të sensibilizojmë ministrinë që të veprojë më shpejt. Rasti është kapur me vonesë dhe masat po merren me vonesë. Kësaj zone të varfër e të rrënuar po i shtohet edhe taksa e rrugës së Kombit. Unë si deputete do ngre zërin që çdo familje e dëmtuar të dëmshpërblehet”.
Ndërkohë vetë fermerët kanë ngritur shqetësimin se deri tani në këtë zonë nuk ka ardhur asnjë vaksinë. Ata kanë kërkuar dhe kompesim për dëmet e shkaktuara nga kjo sëmundje, ndërsa janë ankuar dhe për dëmet ekonomike që u ka sjellë bllokimi i tregtimit të mishit.
