Fluksi i aplikimeve të maturantëve për të vijuar studimet e larta ka shkaktuar jo në pak raste probleme deri në bllokim të sistemit të Agjencisë Kombëtare të Provimeve. Kjo Agjenci sqaron se nga ky proçes nuk do të përjashtohet asnjë nxënës, ndërsa do të punohet gjatë fundjavës në pritje edhe të aplikantëve të fundit. Të dhënat e përzgjedhjes së programeve të studimit do t’i kalojnë Universiteteve nga data 16 deri 30 gusht. Kuotat e pranimit dhe tarifat e studimit do vendosen nga Inistitucionet e arsimit të lartë.
Arben Fagu: Pati një problem të supermbingarkesës nga dreka dhe ne menjëherë ne morëm masat siç mund të merren masat para një dere të shërbimeve ku bëhet një turmë e madhe dhe vendoset një radhë duke thënë hyni ju të parët, pastaj të dytët këto. Dhe ne këtë bëmë. Mbyllëm sistemin për disa rrethe, e hapëm për ca, pastaj kur u shkarkua ngarkesa këtu e hapëm për tjetër. Gjithçka shkoi mirë.Nga ora 00:00 deri në 01:00 të natës janë bërë mbi 1 mijë aplikime të Tiranës. Do të hapet dhe të shtunën, Tirana qytet, Tirana qark për çfarë kanë mbetur. Nëse do të kenë nevojë edhe këto rrethe që kanë punuar, ne e kemi të dielën në dispozicion.
Drejtori i bazës së të dhënave dhe sistemit në AKP, Arben Fagu, thotë se listat përfundimtare të aplikantëve do tu dorëzohen në datën 16 gusht Universiteteve që bëjnë pranime me konkurs dhe në datën 30 gusht për të gjitha insitucionet e arsimit të lartë publik dhe jo publik.
Arben Fagu: Me datë 16 ne duhet ti çojmë të gjithë Universiteteve që ofrojnë konkurse, ti çojmë listat Universitetit të Arteve, të Sporteve. Dhe pastaj me 30 gusht të këtij viti ne u çojmë të gjitha Universiteteve të gjitha të dhënat e maturantëve dhe kandidatëve (maturantët e viteve të kaluara) të cilët kanë përzgjedhur një program studimi.
Maturanët që nuk kanë mesatare mbi 6, skualifikohen nga e drejta për të nisur Universitetin, pasi VKM përcakton qartë se kjo mesatare është pragu i hyrjes në auditoret e institucioneve të arsimit të lartë.
